DILI, STLTIMORLESTE.com – Relasiona ho sidadaun sira neebe konstrui uma besik tasi ibun, foho lolon no mos mota ninin, Ministru Justisa, Sergio Hornai dehan, sei iha rejime juridiku rua atu regula konstrui uma iha fatin sira nee.
“Iha diploma rua, hau hanoin iha planu lejislativa tinan ida nee nian, ita halo ona subensaun ba iha Ministeriu Prezidensia Konselhu Ministru diploma importante ida mak diploma dominiu publiku Estadu, rai sira neebe besik iha tasi ibun, iha 50 metru husi tasi baku sae ba iha rai maran, sei regulariza ida nee atu halo normalizasaun,” dehan MJ, Sergio ba jornalista sira iha Kaikoli, Dili, Kuarta (22/01/2025).
.
Nia hatutan, ba sira neebe agora sei hela tama iha dominiu publiku Estadu, katak rai sira neebe besik tasi ibun pertense ba iha Estadu nian, tenke regulariza atu nunee bele retoma fila fali regulamentu nee.
Rejime juridiku ida kona-ba dominiu privadu Estadu neebe sei regula kona-ba rai sira neebe ses aan husi 50 metru, iha rai lolon sira neebe ema okupa sei regulariza atu iha rejime ida regulariza kona-ba sasan sira nee, banhira mak bele hela besik iha tasi ibun, no bainhira mak bele permite hela besik iha mota ninin, no fatin neebe protejidu atu labele halo atividade iha neeba.
Iha fatin ketak, Komunidade Suku Komoro, Domingos Mendonsa dehan, Governu sira tenke sosializa lei ruma, atu populasaun sira labele halo arbiru uma iha rai neebe Estadu bandu.
“Tenke hato informasaun ruma ba komunidade sira, tanba dala ruma komunidade sira la hatene halo uma besik tasi ibun, foho lolon no mota ninin, ikus mai foin hatene fali fatin sira nee labele halo uma,” dehan nia.
(ter)
