ERMERA, STLTIMORLESTE.com – Governu liu husi Sekretaria Estadu ba Igualdade (SEI), intensifika Fundu Transferensia Publika ba feto sira, tuir proposta neebe simu husi feto rural sira.
Sekretariu Estadu Ba Igualdade (SEI), Elvina Sousa Carvalho hatoo kestaun nee ba jornalista sira, bainhira remata selebra loron Internasional Feto Rural, iha Munisipiu Ermera, Kuarta (15/10/2025).
Nia dehan, iha grupu ida rua mak hetan benefisia ba fundu husi SEI nian, maibe ba oin sei intensifika liu tan.
“Iha feto maluk grupu ida rua nuudar benefisiaria ba iha fundu transferensia publika husi SEI, ba oin Ita intensifika investimentu ba ida nee depende ba proposta neebe tama,” dehan Sekretaria Estadu ba Igualdade nee.
Governante nee dehan, fundu transferensia publika neebe SEI iha, atu bele empodera nomos dudu kresementu ekonomia.
“Fundu transferensia uublika nee SEI iha atu bele empodera no dudu, kresementu Ekonomia liu liu ba feto sira,” dehan Elvina.
Nia hatutan, iha grupu neebe barak tebes mak hetan benefisia.“Ami iha grupu barak tebes depois mak fo dadus maibe oras nee iha grupu barak, grupu balun susesu balun kotu iha dalan klaran maibe sei fo dadus,” katak nia.
Iha biban nee nia mos husu feto iha Timor laran tomak, atu hamutuk hodi kontribui ba dezenvolvimentu nasional liu husi serbisu neebe mak iha.
“Liu husi serbisu no papel neebe mak iha no karik sai Inan entaun sai Inan neebe diak hodi eduka oan siran se sai toos nain entaun sai toos nain neebe diak hodi produs aihan neebe nutritivun se sai suru nain karik sai suru nain neebe diak prezerva identidade TL,” dehan governante nee.
Jornalista: Emerenciana Pinto
Editora: Carme Ximenes
