DILI, STLTIMORLESTE.com – Sekretaria Estadu ba Igualdade (SEI), Elvina Sousa Carvalho hatete, SEI la tolera no kondena makaas ba ema neebe halo aktu asediu seksual iha instituisaun publiku.
Sekretaria Estadu ba Igualdade, Elvina Sousa Carvalho hatoo kestaun nee ba jornalista sira iha nia knaar fatin Kaikoli, Segunda lokraik (06/10/2025).
Nia hatete, Sekretaria Estadu ba Igualdade la tolera aktu asediu seksual iha instituisaun publiku ou iha instituisaun publiku sira ou iha funasaun publiku ou iha eskola sira.
“Dezde inisiu Sekretaria Estadu ba Igualdade mantein nia pozisaun ida nee, primeiru aprsesia ba estudante sira neebe iha korajen atu koalia sai kona-ba aktu asediu seksual neebe sira ultrapasa, hau hanoin ida nee todan tebes ba sira atu koalia, maibe grasa adeus sira iha korajen atu koalia sai bainhira sira denunsia ona, hau fiar katak kazu nee sei lao ba oin,” dehan Sekretaria Estadu.
Sekretaria Estadu ba Igualdade agora hamutuk ho ensinu superior iha hela kooperasaun ida hamutuk ho institutu superior sira atu bele introdus zero toleransia ba iha asediu seksual iha ensinu superior sira, ida nee lao hela, universidade sira durante nee halo hela esforsu hodi bele halakon kualker tipu husi violensia hasoru feto no labarik feto iha eskola ka kampus nomos lansa hela zero toleransia asediu seksual iha kampus sira.
“kampus sai fatin seguru ba feto no labarik feto hodi halo sira nia estudu, tantu feto no mane neebe halao estudu tenke livre husi kualker tipu violensia bazeia ba jeneru, livre husi bullying no livre husi asediu seksual, no ami kondena aktus seksual neebe mak komete husi ita nia dosente sira,” katak nia.
Membru Governu nee hatete, dala barak mos dosente sira uza poder neebe mak sira iha atu bele ameasa no bele mos husi vantajen husi sira nia pozisaun atu ameasa estudante sira.
“Dala barak ameasa atu fo valor neebe la diak no sira la pasa iha sira nia materia, ida nee ita kontra no kondena makaas, ami nafatin fo korajen ba estudante sira atu koalia sai saida deit mak sira ultrapasa,” katak nia.
Nia hatete, SEI la tolera, Governu la tolera kualker tipu asediu seksual, sese deit mak komete asediu seksual nia tenke ba hatan, Governu liu husi SEI iha politika zero toleransia ba iha asediu seksual neebe mak promove husi SEI ho parseiru sira inklui funsaun publiku implementa hela politika zero toleransia, ida nee atu hatete deit katak laiha toleransia ba sese deit, atu Prezidente Autoridade ka se deit nee labele tolera.
Elvina dehan, korajen sira neebe vitima sira koalia sai nee nuudar parte ida husi advokasia neebe mak susesu husi sosiedade sivil, SEI ho nia parseiru sira, tanba ema la nonok ona kuandu sente nia direitu violadu, ema la nonok ona kuandu bainhira vitima ba asediu seksual nee progresu boot ida, uluk feto atus ba atus mak nonok la koalia sai, maibe agora sira barani, ida nee tenke valoriza fo korajen neebe mak feto maluk sira hasoru.
Aleinde nee, tuir observasaun neebe mak STL hetan, iha Universidade Nasional Timor Lorosae UNTL halo manifestasaun ba dosente balun neebe deskonfia halo asediu seksual ba estudante sira.
Jornalista: Emerenciana Pinto
Editor: Xisto Mendonça
