DILI, STLTIMORLESTE.com – Sekretaria Estadu ba Igualdade (SEI) nafatin halo advokasia no promosaun ba igualdade no inkluzaun no implementa politika liga ba promosaun igualdade jeneru.
Kestaun nee hatoo husi Sekretaria Estadu ba Igualdade, Elvina Sousa Carvalho ba jornalista sira iha Hotel Timor, Segunda mee (01/12/2025) hatete, Governu liu husi Sekretaria Estadu ba Igualdade nafatin halo advokasia no kordena no lidera ba promosaun igualdade no inkluzaun asegura politika ba promosaun igualdade jeneru.
“Ami nia servisu prinsipal hanesan imi hatene, ami halo advokasia kordena no lidera advokasia ba iha promosaun igualdade Inkluzaun no asegura implementasaun politika sira ligadu ho promosaun igualdade jeneru no empoderamentu feto no labarik feto sira, protesaun ba labarik feto sira nomos feto sira husi kualker tipu violensia oin-oin hasoru feto no labarik feto sira,” dehan SEI.
Membru Governu nee hatoo apresiasaun ba parte hotu neebe mak luta hodi implementa politika atu haree asuntu asediu seksual nomos prevensaun ba violensia bazeia ba jeneru iha Timor Leste.
“Parte ami nia mak halo advokasia nomos asegura linas ministerias sira halo implementasaun no politika sira nee, tanba nee ami hakarak hatoo apresiasaun klean ba Ministeriu Ensinu Superior Siensia no Kultura neebe mak ho seriedade tebes haree ba assuntu asediu seksual no prevensaun ba violensia bazeia ba jeneru iha estabelesementu ensinu superior sira nomos universitariu sira,” katak nia.
Nia hatete, ida nee komitmentu husi IX Governu Konstitusional atu asegura protesaun direitu feto no labarik feto sira nomos asegura ba promosaun igualdade jeneru no inkluzaun iha Timor Leste, nunee realiza seminariu nee mos momentu ida importante atu hetan komitmentu husi universitariu sira ba iha prevensaun ba iha violensia bazeia ba jeneru, liu husi diskusaun ida nee sei hamosu kurikulu ida neebe mak ho intensaun atu integra prevensaun violensia bazeia ba jeneru.
Nunee mos feto Potensia Maria Amaral hatutan, advokasia nee importante tebes ba iha sosiedade sira, tanba ohin loron lei iha maibe ema barak seidauk asesu ho diak, tanba nee advokasia nee importante.
“Lei Violensia domestika nomos lei garante feto nia direitu, maibe ita haree iha area remotas sira komunidade barak seidauk hatene klean, tanba nee Governu nomos sosiedade sivil nafatin halo advokasia ba iha komunidade,” katak nia.
Nia hatutan, advokasia labele halo iha nasional deit maibe presiza tun ba iha area remotas sira, tanba iha nasional komunidade sira bele asesu husi media husi televizaun radio, maibe iha area remotas komunidade barak la asesu ba informasaun husi televizaun, tanba barak seidauk asesu ba ahi eletrisidade, tanba nee presiza halo sosializasaun.
Nia hatete, maske iha lei maibe familia balun sei uza kultura hodi hanehan feto sira, entaun husi sosializasaun bele fo hanoin katak feto iha direitu hanesan mane no violensia domestika nee krime publiku laos bikan kanuru mak tarutu.
Jornalista: Emerenciana Pinto
Editor: Xisto Mendonça
