DILI, STLTIMORLESTE.com – Sekretariu Estadu ba Igualdade (SEI) organiza enkontru rede referal, hodi partilha informasaun kona-ba progresu no dezafiu iha implementasaun Planu Asaun Nasional Violensia Bazeia ba Jeneru (VBJ).
SEI organiza enkontru rede referal liu-liu oinsa atendimentu ba vitima sobrevivente Violensia Bazeia ba Jeneru durante tinan 2024 nia laran.
Objetivu husi sorumutu nee hodi halibur informasaun kona-ba atendimentu servisu ba vitima violensia bazeia ba jeneru durante fulan Janeiru too Marsu tinan 2025 nia laran, oinsa mekanizmu no estratejia ba advokasia ba dezafiu neebe vitima hasoru.
Bainhira remata enkontru, Sekretariu Estadu Igualdade (SEI), Elvina Sousa Carvalho ba jornalista sira nia iha knaar fatin Kaikoli, Tersa nee (18/03/2025) hatete, enkontru rede referal nee halo regularmente, liga ho servisu prevensaun nia.
“Enkontru nee halibur rede referal sira neebe mak servisu ba iha prevensaun, servisu ba iha advokasia nomos servisu iha provizaun legal sira neebe mak ita haree katak durante nee servisu ba iha prevensaun Violensia Bazeia ba Jeneru no kualker tipu neebe hasoru ba feto no labarik feto sira,” dehan Elvina.
Sekretariu Estadu nee dehan, nee atividade regular hamutuk koalia kona-ba dezafiu progresu neebe kada ministerial no rede referal sira halo durante nee no haree hamutuk saida mak halo ba oin.
Nia hatutan, enkontru ohin diak tebes, tanba membru rede referal sira update sira nia servisu neebe mak iha progresu aumezmu dezafiu barak, maibe nafatin iha komitmentu servisu atu prevene no halo advokasia hodi hamenus violensia neebe mak feto no labarik sira hasoru durante nee.
Nunee mos reprezentante husi JSMP, Rita de Jesus Guterres husi nia intervensaun hatete, kona-ba progresu neebe JSMP haree katak dala barak monitorizasaun neebe JSMP halo pena multa, Ministeriu Publiku rasik mak iha nia alegasaun husu kedas atu fo pena multa ba arguidu, ida nee Tuir JSMP pena multa la efeitu.
“Iha dezisaun tribunal aseita ho alegasaun neebe mai husi Ministeriu publiku, tuir JSMP nia haree katak pena multa nee ladun efeitu tanba arguidu neebe dala barak hetan pena multa nia efeitu jeral laiha, tanba nee mak dala barak ami halo advokasia oinsa mak tribunal fo deit karik pena suspensaun mos ho regra konduta, katak iha futuru arguidu labele repete tan nia hahalok neebe mak iha,” katak nia.
Entretantu enkontu rede referal nee hetan partisipasaun masimu husi linha ministeriu sira no parseria dezenvolvimentu sira hotu mak hanesan Ministeriu Edukasaun, Ministeriu Justisa, MSSI, Terras Propriedade, INSIDA, PNTL, Alfela, Fokupers, Fundadaun Alola, JSMP, CBRNTL, Caza Vida, Komisaun Justisa no paz Diosege Dili, Care Internasional, Hamnasa, Unicef, Plan Internasional no PDHJ.
(eme)
