BAUKAU, STLTIMORLESTE.com – Sekretaria Estadu no Igualidade (SEI) hamutuk ho Autoridade Munisipiu Baukau selebra loron Nasional ba feto Timor Leste dala 49, iha Suku Kaibada, Postu Administrativu Baukau Vila, Munisipiu Baukau, ho tema “Selebra o nia Direitu Igualidade no Oportunidade”.
Reprezentante Sekretariu Estadu no Igualidade, Eurosia Sarmento esplika, selebrasaun loron nasional feto Timor-Leste tuir lo-loos selebra iha loron 03 Novembru, maibe la konsege, tanba enkomoda ho loron finadu, maibe nafatin selebra iha loron 08 Novembru nee anivel nasional selebra ona iha Atauro no anivel Munisipiu iha Baukau selebra iha loron 14 Novembru ho objetivu, atu fo hanoin hikas fali eroina sira hanesan Maria Tapo, Rosa Bona Parte, Maria Goreti, Wewe no saudoza sira seluk neebe dedika aan iha prosesu luta libertasaun nasional, tanba iha prosesu luta naruk Timor nian feto barak hetan torturasaun violensia no diskrimisaun too Timor hetan ukun aan.
“Mensajen husi Sekretaria Estadu nian, tempu ona feto tenke brani forte hamrik iha oin, atu lidera hasoru violensia oin oin hateten lae ba violensia, tempu ona feto tenke hetan oportunidade moris igual hapara ona hateten feto labele, maibe hateten deit feto sempre bele,” Eurosia haktuir liu husi diskursu, bainhira selebra loron nasional feto Timor Leste, iha Suku Kaibada, Sesta (14/11/2025).
Nia komenta, mensajen refere espresa, tanba mundu ohin loron iha matenek ho hamnasa esforsu husi feto, tanba nee labele halo feto sai hatan no labele konsidera feto hanesan lixu hodi hamonu beibeik feto nia matan been, maibe tane feto sira, tanba feto nia prezensa mak milagre ida ba mundu.
Reprezentante Sekretaria Estadu nee husu entidades hotu, atu hamutuk proteje feto maluk sira husi violensia oin oin, tanba mundu ohin loron nafatin konsidera feto hanesan lixu hodi halo feto sira kontinua tanis.
Iha fatin Reprezentante Prezidente Autoridade Munisipiu Baukau, atual Sekretaria Munisipal Asuntu Sosial, Maria Celestina Viegas akresenta, selebrasaun loron Nasional Feto Timor-Leste importante atu selebra, tanba tinan 49 liu ba eroina Maria Tapo kaer kilat hamutuk ho mane luta nain sira hodi hasoru invazor, nunee prosesu luta libertasaun nasional sai ezemplu ba feto no mane agora atu hamutuk foti solusaun ba problema sira neebe infrenta.
“Ita feto mane tenke apoia malu se mane sira la fo oportunidade ba feto sira, feto sira labele halo buat ida dala barak feto sira lao livre kaben mane sira la fo oportunidade, espera katak ita tau iha hanoin ida deit katak hanesan saudoza sira neebe hau temi ita banati tuir sira nia aten brani hatudu ona iha tinan 49 liu ba, entuan feto sira tau forsa hamutuk hodi hatutan mehi neebe ita nia saudoza sira mehi kore povu husi moris kiak ba moris diak prezisa ema hotu-hotu,” Maria katak.
Reprezentante Prezidente Autoridade nee husu Autoridade Suku sira, atu nafatin fo oportunidade ba maluk feto sira iha nivel suku, hodi foti dezisaun hamutuk ba dezenvolvimentu Suku nian liu liu preparasaun ba implementasaun poder lokal.
Enkuantu Xefe Suku Kaibada, Cosme da Costa Lopes apresia ba planu implementa selebrasaun loron Nasional Feto Timor-Leste ba dala 49 iha Suku Kaibada, tanba bele motiva mane maluk sira hodi respeita feto nia dezisaun no importante ba Autoridade Suku sira atu involvimentu feto sira iha nivel enkontru Suku hodi foti dezisaun hamutuk.
“Feto importante tebes Nasaun nee atu furak too iha neebe feto tenke envolve iha neeba maibe mos ho mane, tanba parte rua nee kompleta malu mak foin ita haree nia furak, mais feto ita tenke involve iha kualker atividade dezenvolvimentu no seluk ita tenke involve sira,” Cosme komenta
Nia husu mane maluk sira atu valoriza feto nia dezisaun no promove feto sira, lalika halo limitasaun ba feto hodi konsidera feto labele, maibe konsidera no simu sira nia opiniaun, tanba feto mos sidadaun hotu neebe lei garante sira nia direitu.
Entretantu selebrasaun loron Nasional Feto Timor-Leste, iha Suku Kaibada hetan partisipasaun husi komunidade no feto potensial sira, iha Munisipiu Baukau.
Jornalista: Tomas Reis
Editora: Carme Ximenes
