BAUKAU, STLTIMORLESTE.com – Sekretaria Estadu ba Igualdade (SEI) selebra loron Feto Timor Leste ba dala 48, iha Postu Administrativu Kelikai, Munisipiu Baukau.
Informasaun nee hatoo husi Sekretaria Estadu ba Igualdade, Elvina Sousa Carvalho ba jornalista sira bainhira selebra loron Feto Timor Leste ba dala 48 iha Postu Kelikai, Kinta nee (07/11/2024).
“Ohin loron importante tebes ita hotu hatene katak, atu selebra loron Feto Timor nian korajen Feto Timor nia sentidu nasionalizmu no Feto Timor nia aten barani,” dehan nia.
Governante nee konsidera, selebrasaun loron Feto Timor Leste ba dala 48 nuudar sentidu iha atu motiva feto maluk sira iha teritoriu laran tomak, atu hetan korajem husi eventu selebrasaun hodi hatudu sentidu nasionalizmu ba feto eroina sira neebe ho aten barani sakrifika aan ba prosesu luta naruk Timor nian.
Nia sublina, selebrasaun loron feto mak nuudar meius ida atu korajen Feto maluk foinsae sira atu luta ba dezenvolvimentu hanesan ho feto maluk Maria Tapo neebe barani tebes foti risku ba nia aan hodi hamriik iha lina frente hasoru invazor sira.
“Selebrasaun nee ita uza mos hanesan reflesaun para hodi hakat ba oin, hasai feto husi nakukun nia laran, ita bele dehan kultura neebe mak hanehan demais feto la fo oportunidade ba feto,” nia akresenta.
Elvina deklara, mezmu direitu feto no mane hanesan neebe konsagra iha K-RDTL, maibe feto nia partisipasaun iha prosesu dezenvolvimentu sei menus, tanba kesi metin husi sistema kultura neebe la fo oportunidade ba feto.
Nia argumenta, maibe daudaun iha ona mudansa ba sistema kultura, tanba feto hahu hetan oportunidade partisipa iha Parlamentu Nasional atinjimentu 40%, iha Governu 13%, enkuantu iha area Administrasaun Publiku feto foti dezisaun ba kargu Prezidente Autoridade Munisipiu foin iha nain 2, Administradora nain 3 neebe numeru partisipa feto sei kiik tebes, tanba informasaun hodi fo oportunidade ba feto atu sai lideransa seidauk kobre too Suku.
Iha fatin hanesan, partisipante Juvita Mia Amaral sente kontente ho programa SEI neebe bele hili Postu Kelikai sai fatin selebrasaun loron Feto Timor Leste ba dala 48, tanba objetivu atu motiva sosiedade tomak Postu Kelikai nian hodi husik feto sira kompete iha prosesu dezenvolvimentu, maibe laiha planu diak ba eventu refere, tanba laiha programa neebe motiva komunidade sira.
“Ami husu ba SEI atu hakbesik nafatin programa sira Igualdade Jeneru nian ba too area remotas hodi empodera liu tan feto sira iha area Saude, Edukasaun, Agrikultura no seluk tan, tanba ami komunidade iha baze seidauk iha konhesimentu oinsa mak fo livre ba feto atu partisipa iha dezenvolvimentu,” nia sujere.
Entretantu partisipa iha eventu nee kompostu husi feto sira husi Suku 15 husi Postu Administrativu Kelikai no estrutura Postu 6 nomos estrutura husi Autoridade Munisipal.
(EST 2)
