DILI, STLTIMORLESTE.com – Sekretariu Estadu ba Igualdade (SEI) hamutuk ho UN Women servisu makaas liu husi halo advokasia ho linhas Ministerias no kampus sira oinsa prevene asediu seksual iha servisu fatin no kria kampus seguru.
Kestaun nee hatoo husi Sekretaria Estadu ba Igualdade, Elvina Sousa Carvalho ba jornalista sira bainhira remata halo enkontru ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Kinta lokraik (12/06/2025).
Sekretaria Estadu no Igualidade dehan, oras nee daudaun SEI hamutuk ho UN Women servisu makaas oinsa halo advokasia hodi prevene asediu seksual iha fatin servisu no kria kampus seguru.
“Sekretariu Estadu ba Igualdade halao nia servisu halo advokasia ba iha linhas ministerial sira nomos ho Komisaun Funsaun Publiku atu bele prevene asediu seksual iha servisu fatin,” dehan SEI.
Elvina dehan, aleinde ida nee mos la taka dalan ba servisu neebe mak Sekretaria Estadu ba Igualdade halo koordenasaun ho UN Women nomos husi parte Ministeriu Ensinu Superior hodi servisu hamutuk oinsa bele kria kampus ida neebe mak seguru, kampus neebe livre husi asediu seksual nomos livre husi boling ruma neebe mak akontese iha eskola sira.
“Atu hatete deit katak iha kampus 3 ka 4 ona halo ona nia servisu no halo ona deklarasaun katak kampus nee livre husi asediu seksual, hau la sala asina ona akordu memorandum intedementu ho Un Women ho Sekretariu Estadu ba Igualdade para hodi asegura katak eskola nee livre duni husi asediu seksual,” dehan SEI Elvina.
Nia dehan, kampus neebe hahu asina akordu mak Universidade Nasional Timor Lorosae, Spit, no DIT mos agora tama ona iha lista ida nee, no universidade seluk iha ona komunikasaun atu bele halo akordu neebe hanesan ho ensinu superior.
Nunee mos lei trabalhu domestika ate agora seidauk iha maibe prosesu ba halo lei nee iha ona diskusaun nunee mos iha ona vontade husi SEFOPE atu avansa ho lei trabalhador domestika, ida nee atu dignifika trabalhador domestika sira iha seguransa servisu liu husi kontratu no servisu livre husi asediu seksual ka prevene kualker tipu violensia hasoru sira iha sira nia servisu fatin.
Ida nee advokasia husi Sekretariu Estadu ba Igualidade ho linhas Ministerias sira partikularmente ho SEFOPE iha ona progresu draf iha ona hein deit lori ba Konselhu Ministru hodi ba iha Parlamentu Nasional.
(eme)
