DILI, STLTIMORLESTE.com – Governu Timor Leste liu husi Sekretariu Estadu ba Igualdade (SEI) ho UNDP asina memorandu intendimentu no lansamentu sertifikasaun jeneru, Gender Equality Seal.
Bainhira remata halo lansamentu, Sekretaria Estadu ba Igualdade (SEI), Elvina Sousa Carvalho ba jornalista sira iha salaun Maria Gorente Kaikoli, Segunda (06/10/20265) hatete, Sekretariu Estadu ba Igualdade hamutuk ho UNDP asina memorandu hodi lansa kooperasaun ida neebe nia intensaun atu introdus Gender Equality Seal iha Timor Leste.
“Gender Equality Seal mak hanesan premiu ida neebe mak fo ba instituisaun estadu sira nomos linas ministerial sira neebe mak promove igualdade jeneru iha sira nia orsamentu, iha sira nia programa, sira nia atividade sira iha linas ministerias sira, ita hotu hatene katak linas ministerais sira durante nee barak mak introdus hela, barak mak implementa hela programa promove igualdade jeneru,” dehan Sekretaria Estadu.
Sekretariu Estadu hatete, Gender Equality Seal ida mai atu fo mos rekonesimentu no valorizasaun ba linas ministerias sira neebe mak konsege introdus no hatuur programa sira hodi avansaun igualdade jeneru iha sira nia linas ministerias sira.
Sekretaria Estadu hatete, programa nee entre Sekretaria Estadu ba Igualdade ho UNDP neebe hetan finansia husi Uniaun Europeia hodi implementa programa ida nee, tanba nee kooperasaun ida nee importante no estratejiku tebes atu avansa igualdade jeneru iha Timor Leste, liu-liu ba linas ministerias sira nomos instituisaun estadu atu bele avansa liu tan, bele investe liu tan iha promosaun igualdade jeneru iha sira nia instituisaun.
“Hau hanoin programa foin atu lao no foin introdus mais la signifika durante nee instituisaun estadu sira la promove igualdade jeneru, sira promove liu husi sira nia orsamentu no programa neebe sira iha maibe Gender Seal nee mai atu bele haforsa no bele fo mos rekonesimentu ba instituisaun sira hodi bele investe liu tan, intensifika investimentu ba promosaun igualdade jeneru iha linas ministerias sira,” katak nia.
Nia hatete, programa nee implementa ba tinan 2 tuir etapa neebe iha, no ohin lansa presiza tempu tinan 2 atu bele rekonesimentu no ba instituisaun ida ka rua neebe mak prienxe kriteria sira neebe mak iha.
Nunee mos Katvna Argueta husi UNDP Resident Representative hatoo parabens ba Sekretariu Estadu ba igualdade jeneru ho inisiativa luta makaas ba assuntu igualdade jeneru.
“Hau hatoo parabens ba lideransa husi Sekretaria Estadu ba Igualdade neebe koalia makaas kona-ba direitu no dever liu-liu ba asuntu igualdade jeneru,” dehan nia.
Nia hatete, maske luta ba igualdade jeneru nee kompleksu maibe kona-ba asuntu igualdade jeneru neebe valoriza husi estadu Timor Leste hodi promove igualdade jeneru.
Jornalista: Emerenciana Pinto
Editor: Xisto Mendonça
