DILI, STLTIMORLESTE.com – Atu regula Advogadu Privadu sira halao knaar diak liu tan, presiza iha esbosu ida kona-ba lei Ordem dos Advogados hodi regula sira nia servisu, maibe too agora seidauk iha Ordem dos Advogados Privado.
“Se la iha Ordem dos Advogados, entaun la iha ordem ida hodi regula sira, signifika sira lao la tuir ordem, tanba nee presiza aprova Ordem dos Advogados,” dehan Jurista Alexandre Corte Real ba STL iha Kaikoli, Tersa (26/08/2025).
Nia dehan, tenke iha Ordem dos Advogados hodi regula kona-ba prosesu neebe sira kaer, osan hira mak sira sei husu ba iha kliente.
Nia esplika, Defensor Publiku iha sira nia ordem, tanba nee Advogadu Privadu mos tenke iha nia ordem rasik, tanba liga ba ema presiza iha norma ida atu regula, atu buat sira neebe halo legal. Tanba nee husu ba iha Parlamentu Nasional haree ba iha kestaun nee, atu halo aprovasaun ba iha lei Ordem dos Advogados hodi sai nuudar normas ida atu Advogadu sira bele fo advokasia.
Iha fatin ketak, tuir Koordenadora Grupu Trabalhu Reforma Setor Justisa, Lucia Lobato dehan, sira nia parte mos halo ona diskusaun kona-ba lei Advogadu Privadu nian.
“Hau nia Gabinete mos fo apoiu kona-ba esbosu ida uluk nee, ami mos halo diskusaun lubuk ida haruka ba iha Ministru Justisa, too agora la iha ema ida hatan, maibe hau prepara ona, se ema ida la hatan hau haruka diretamente ba Primeru Ministru, depois PM deside atu halo saida ho projeitu neebe hau hatoo ba,” dehan nia.
Nia esplika, Advogadu nia papel importante tebes, tanba nee Advogadu tenke tuir mos lei neebe regula sira nia servisu.
Nia sublina, koalia laos inventa maibe iha dadus no provas, lei Ordem Advogadu importante tebes, iha ona projeitu mai husi Governu anterior haree hadia hodi hatama, maibe too agora seidauk iha solusaun ruma.
Fiar katak Deputadu sira bele tau prioridade ba lei nee atu bele regula diak liu tan profisaun Advogadu Privadu iha ita nia rain.
(ter)
