BAUKAU, STLTIMORLESTE.com – Profesora bolsa kandidatu 2024 ho naran Suzana Baptista Freitas neebe too ohin loron Servisu Munisipal Edukasaun Munisipiu Baukau seidauk koloka hikas ba eskola Ensinu Baziku Filial Uaiburu, Postu Administrativu Baguia, Munisipiu Baukau, tanba okupadu ho servisu.
“Ida fila fali primeiru razaun ami seidauk bolu, eskola nee kada periodu lo-loos hodi bainhira periodu agora nee mak atu akontese, maibe tanba okupadu, loron boot, buat sira nee hotu nee mak too ohin loron seidauk bolu,” informa Diretor Servisu Munisipal Edukasaun Baukau, Afonso dos Santos da Costa ba jornalista STL iha nia knaar fatin Vila Nova, Baukau, Kinta (21/08/2025).
Tuir nia, razaun seidauk koloka hikas profesora Suzana Baptista Freitas ba eskola Ensinu Baziku Uaiburu, tanba Servisu Edukasaun Baukau antes nee okupadu ho loron nasional no servisu seluk tan, maibe sei muda iha tempu besik.
Nia argumentu, muda profesora Suzana husi eskola Uaiburu ba hanorin estudante sira iha eskola Buasare la kestaun, Edukasaun Baukau konsidera profesora Suzana Baptista Freitas espesial, maibe muda husi kolokasaun orijen, tanba kestaun kondisaun gravida iha momentu neeba.
“Agora ita hein lai, tanba ita seidauk bolu, maibe iha loron ida rua livre ita bolu para ba fila fali nia fatin, se nia lakohi ba hatama karta rezignasaun, ida-idak nia direitu ita la interven,” Afonso katak.
Nia sublina, Servisu Edukasaun Baukau mos dadaun planu ona atu muda hikas profesora refere ba nia fatin kolokasaun orijen husi Komisaun Funsaun Publiku iha tempu besik, maibe bainhira profesora refere lakohi bele submete karta rezignasaun.
Mezmu kolokasaun profesores bolsa kandidatu tinan 2024 ba eskola sira, tuir despaisu ministerial numeru 19/2024, loron 13 Maiu kona-ba determina abertura konkursu bolsa kandidatu dosente neebe anexa deklarasaun rekerente tuir artigu 47 kona-ba regulamentu rekrutamentu ingresu karreira dosente.
Nunee mos bazeia ba aprovasaun diploma ministerial numeru 82/2023, loron 22 dezembru fo sai pontu tolu importante ba kandidatu sira hodi deklara hanesan; (i) prosesu selesaun no kolokasaun hanesan dosente iha eskola ida, sei depende ba vaga iha futuru tuir determinasaun husi Ministeriu Edukasaun no Komisaun Funsaun Publika, (ii) tama ba bolsa kandidatu la rezulta katak, hau iha ona serbisu no relasaun serbisu ho Estadu no (iii) hau laiha direitu atu ezije tenke tama iha karreira dosente tanba deit hau tama iha bolsa kandidatu.
Aleinde nee, tuir alinea b, numeru 2, artigu 21 no 22 kona-ba regulamento rekrutamentu, kada kandidatu deklara katak: (i) hau hatene katak hau labele ezije atu hetan kolokasaun iha Munisipiu neebe hau identifika iha rekerimentu. ida nee karik hau hetan xamada hodi tama ba karreira dosente no (ii) hau prontu atu simu kolokasaun iha fatin neebe deit iha territoriu Nasional. Maibe diretor nee hatan, la kontra despaisu refere, tanba kestaun kondisaun umana.
“Nee laos kontra, nee ema nia kondisoens husi Nasional ita fo informasaun sira aseita tanba kondisoens profesores ida nee mak halo neebe la kontra buat ida,” katak Afonso
Diretor Edukasaun Baukau nee hateten, prosesu muda profesora Suzana Baptista Freitas husi eskola Uaiburu ba eskola Buasare Baukau Vila hetan aseitasaun husi Nasional hetan koordenasaun husi Inspetor Eskola Baguia, Diretor EBC Ossohuna no Koordenador EFB Uaiburu iha momentu neeba.
(tom)
