DILI, STLTIMORLESTE.com – Sekretariu Jeral (Sekjer) RENETIL, Joaquim da Fonseca husu Prezidente Republika (PR), Jose Ramos Horta kondekora membru nain 12 neebe mate iha funu laran.
Nia hatete, foin halo audensia ho Prezidente Republika, mai ho objetivu espesifiku ida atu propoin ba Prezidente Republika atu fo kondekorasaun postum ba membru RENETIL 12.
“Propoin senhor Prezidente Republika atu kondekora postum ba membru RENETIL nain 12 neebe mak mate iha funu laran, nain rua mate iha 1997 enkuantu sira foin fila husi asaun ida iha Jakarta, nain 10 seluk mate durante prosesu konsulta popular iha 1999,” dehan Sekretariu Jeral nee ba jornalista iha Palasiu Prezidensial Nicolau Lobato, Bairo Pite, Kinta (13/11/2025).
Nia afirma, pedidu halo tiha ona ba Prezidente Republika, no ohin sei hein fila fali husi Gabinete Prezidensia Republika para bele informa mai, hodi bele komunika ho familia sira neebe mai partisipa iha prosesu nee.
Nia hatete, RENETIL husu para estadu atu fo rekonhesimentu no fo apresiasaun ida neebe adekuadu no apropriadu ba sira nia sakrifisiu. Sira joven lo-loos nee moris sei naruk, maibe sira sakrifika sira nia moris tanba atu ba hetan independensia.
“Saudozu nain 12 nee ho naran mak hanesan Mario sa Asunsaun Belo, Saudozu Jose Hernestu de Jesus Maia, Saudozu Jecka Madeira Fatima, Saudozu Kazmeru de Jesus Carvalho, Saudozu Flevio Urbano de Carvalho Ribeiro, Saudozu Bernandino Joaquin Alfonso Guteres, Saudozu Domingos Maukoli, Saudozu Domingos de Fatima Soares, Saudozu Almedio da Consencao, Saudozu Gaspar Tomas Sequira, Saudozu Titisandora Cornel Lopes, no Saudozu Ruben Barros Soares. Saudozu nain 2 ho naran Jecka Madeira Fatima ho Saudozu Cazmeru de Jesus Carvalho mate iha 1997, enkuantu hafoin asaun no okupasasaun ba Embaixada Australia iha Jakarta, no ida mate iha Atauro neebe momentu neeba atu ba halo sosializasaun kona-ba referendum iha Atauro,” dehan nia.
Nia hatutan, saudozu sira seluk balun mate iha rai klaran, iha Munisipiu Lautem, Bobonaro, Ermera, Suai, inklui iha Dili laran. Saudozu nain 12 nee mak membru RENETIL neebe mate iha funu laran, tanba nee mak organizasaun husu ba estadu atu rekohnese sira nia sakrifisiu.
Jornalista: Emerenciana Pinto
Editora: Domingas Gomes
