DILI, STLTIMORLESTE.com – Sekretariu Estadu Komunikasaun Sosial (SEKOMS), Expedito Loro Dias Ximenes abertura seminariu ho topiku kona-ba literasia media, neebe organiza husi Uniaun Profisaun Jornalista Timor Leste (UPJTL) iha Munusipiu Manatutu.
Iha biban nee Sekretariu Estadu Komunikasaun Sosial, Expedito dehan, IX Governu Konstitusional tinan 2025 nee fo apoiu ba asosiasaun jornalista sira hanesan AJTL, UPJ-TL, ho TLPU hodi halo literasia media, literasia dijital no verifika faktus ba joven sira iha munisípiu hotu-hotu.
“Ohin hau mai halo abertura, esplika oituan kona-ba objetivu literasia dijital iha Manatutu nee hodi bele kompriende, tanba joven sira mak futuru no esperansa nasaun nian, nunee wainhira kaer telefone android, uza media sosial ho diak. Asosiasaun sira foin daudaun AJTL halo iha Maliana, hau ba iha Maliana, UPJTL halo iha Venilale, ohin halo iha Manatutu, oinsa joven sira bele kompriende literasia dijital, no mediatika nee objetivu atu bele aumenta konhesimentu joven sira nian iha media sosial liu husi plataforma oi-oin neebe iha,” dehan Sekretariu Estadu Komunikasaun Sosial (SEKOMS), Expedito Loro Dias Ximenes ba jornalista sira iha salaun STAE, Sesta (19/09/2024).
Sekretariu Estadu dehan, seminariu nee objetivu atu bele aumenta konhesimentu joven sira nian oinsa bele iuza media sosial liu husi plataforma oin-oin neebe iha, hanesan TikTok, facebook, whatsapp ho plataforma sira seluk tan ho didiak.
“Ohin hau sente haksolok, tanba estudante sira husi eskola barak neebe iha Manatutu partisipa hotu, nunee sira bele iha konhesimentu diak liu tan oinsa mak uza media sosial. Tanba ita hotu hatene media sosial oras nee ho avansu tekonolojia, erra dijital oras nee daudaun ema hotu-hotu uza media sosial ba iha komunikasaun loro-loron nian,” katak nia.
Nia hatutan, Governu tinan-tinan apoiu ba organizasaun jornalista ho asosiasaun radiu komunidade. Liu husi programa, tantu AJTL, UPJ-TL, TLPU, RDK-TL sira hatoo sira nia programa saida, sira halo formasaun ba jornalista iha literasia mediatika, dijital, depois governu haree verifika halo diskusaun ho sira.
Depois SEKOMS atribui tuir sira nia programa, pur ezemplu AJTL hetan barak liu, tanba nia atividade barak liu, UPJ-TL mos hetan atividade rua ka tolu, formasaun jornalista no mos ba literasia dijital, no mos TLPU iha atividade. Purtantu atividade sira nee ho objetivu ida deit oinsa sensibiliza literasia mediatika, dijital ba joven sira iha eskola, oras nee daudaun lao iha munisípiu hotu-hotu.
Apoiu orsamentu AJTL kuaze US$ 9 mil, UPJ-TL kuaze US$ 7 mil, TLPU kuaze US$ 7 mil, purtantu osan nee sira halo tiha atividade depois halo relatoriu mai SEKOMS sira sei hetan, purtantu tuir regra sira sei hetan premiu 60%, depois 40%, la fo dala ida, sira halo atividade sira halo relatoriu mai, depois ami sei transfere tan restu ba sira liu husi programa kategoria transferensia publika.
Nunee mos Prezidente, UPJ-TL, Horacio Babo hatete, tinan ida nee Uniaun Profisaun Jornalista Timor Leste UPJTL hetan apoiu husi IX Governu liu husi Sekretariu Estadu Komunikasaun Sosial (SEKOMS), fundu oituan apoiu ba UPJTL atu realiza seminariu iha munisípiu rua, semana kotuk halo ona iha Venilale, ohin halo iha Manatutu.
“Seminariu ida nee kona-ba literasia media no verifika faktus no oinsa mak utiliza media sosial ho diak ba foinsae sira, liu-liu ba estudante sira. Iha Manatutu ami envolve estudante sira, grupu arte marsiais, arte rituais sira, juventude husi sentru oi-oin iha Manatutu kuaze 100 pesoas. Objetivu husi seminariu ida nee mak divulga informasaun kona-ba oinsa mak uza media sosial neebe diak no seguru, oinsa mak literasia ba foinsae sira,” dehan Prezidente UPJTL.
Prezidente dehan, tanba saida mak foti topiku ida nee, hanesan hotu-hotu hatene iha erra dijital nee media sosial sai hanesan fatin ida neebe ema hotu-hotu halo buat ruma iha neeba, ema bele uza media sosial provoka malu, tolok malu, espalha informasaun falsa sira nee, liu-liu grupu arte marsiais sira dala ruma insulta malu iha media sosial, entaun ami nia alvu mos ba grupu arte marsiais sira katak sira bele utiliza media sosial nee. Maibe utiliza ba buat neebe diak no labele utiliza media sosial nee aspetu sira neebe la diak ba komunidade.
Jornalista: Emerenciana Pinto
Editor: Xisto Mendonça
