DILI, STLTIMORLESTE.com – Governu Timor Leste (TL) liu husi Sekretariu Estadu Komunikasaun Sosial (SEKOMS), Expedito Loro Dias, ohin halo enkontru ho UNDP kona-ba projetu konstrusaun ba edifisiu Radio Televisaun Timor Leste, Empreza Publika (RTTL.EP).
“Ohin hau hamutuk ho Embaixador Japaun iha Timor Leste (TL) ho reprezentante UNDP, ami halo fali reuniaun ida atu bele haree kona-ba aprezentasaun hatoo husi maneja projetu nian kona-ba konstrusaun edifisiu foun RTTL Ep nian, Governu Japaun ho Governu TL hamutuk ho UNDP halo fali enkontru ida atu bele kontinua fila fali projetu nee,” dehan Expedito ba jornalista sira iha Kaikoli, Tersa ( 9/12/2025).
Nia esplika, projetu ida nee dezenhu foun, ohin hatoo ona katak iha ona kompanhia ida manan ona atu halo dezenhu foun no dezenhu nee sei hotu iha fulan rua nee nia laran.
“Komesa ohin too fulan Fevereiru 2026 hotu sei mai aprezenta fila fali, depois ami haree fali, tanba iha diminuisaun oituan, uluk Governu osan iha atu halo andar haat, maibe ho situasaun rai iha Kaikoli ho nia pezu husi andar 4 neebe iha karik auguenta ho rai Kaikoli nia iha, entaun diminui fila fali ba andar tolu, maibe iha hela dezenhu nia laran,” katak nia.
Nia tenik, UNDP hanesan implementador ba projetu ida nee, neebe apoiu husi Governu Japaun sei halao durante 16 mezes, hahu iha fulan Marsu 2026 sei remata iha fulan Setembru ka fulan Outubru tinan 2027
Nia dehan, Kompanhia PT AMITAS husi nasaun Indonezia mak sei halo dezenhu foun ba konstrusaun edifisiu RTTL.EP.
“Kompanhia ninia naran PT AMITAS husi Indonezia mak sei halo dezenhu foun fali no tuir kontratu neebe mak asina tiha ona iha fulan rua nia laran,” dehan Expedito.
Enkuantu dezenhu nee kontinua ho orsamentu neebe mak iha, ba konstrusaun nee montante US$ 4.4 no osan neebe mak mai husi Governu Japaun nee US$ 5.9, iha osan nee nia laran mos sei fo treinamentu ba jornalista sira, osan nee lidera husi UNDP.
Entretantu reprezentante PNUD Timor Leste (TL), Katyna Argueta hatoo agradese ba Governu Japaun ba komitmentu liu husi projetu ida nee, nuudar parte ida husi sira nia komitmentu ba iha dezenvolvimentu sustentavel iha (TL).
“Hau hakarak hatoo agradese wain ba iha lideransa sira husi RTTL ba sira nia kolaborasaun diak ho PNUD ba projetu ida nee, nunee mos hakarak apresia no agradese Governu Jepaun ba sira nia komitmentu liu husi projetu ida nee nuudar parte ida husi sira nia komitmentu ba iha dezenvolvimentu sustentavel iha TL,” tenik nia.
Iha fatin hanesan, Embaixador Japaun iha Timor Leste (TL), Tetsuya Kimura dehan, enkontru ohin nee deskuti kona-ba oinsa atu avansa projetu ida nee ba oin.
“Hau hakarak hatoo hau nia apresiasaun kona-ba kooperasaun diak entre Governu TL no Governu Japaun, enkontru ida ohin nee deskuti kona-ba oinsa atu avasa projetu ida nee ba oin, enkontru ohin hau renova hau nia kompromisu nuudar reprezentante Governu Japaun ba projetu ida nee,” Kimura hakotu.
Jornalista: EST 1
Editor: Xisto Mendonça
