DILI, STLTIMORLESTE.com – Sekretariu Estadu Komunikasaun Sosial (SEKOMS) husu Radio Komunidade sira atu relay notisia kalan Radio no Televizaun Timor Leste, Empreza Publika (RTTL, E.P) nian, inklui mos traduz notisia tetun ba lian materna kada munisipiu idak-idak.
Sekretariu Estadu Komunikasaun Sosial, Expedito Loro Dias Xemnes hatoo Asuntu nee, wainhira halao enkontru jeral ba Avaliasaun Fundus Tranferensia Publika (FTP) 2024 ba Radio Komunidade sira no Planu Ezekusaun FTP ba tinan 2025.
Nia dehan, enkontru ida ohin atu halo avaliasaun nomos prosesaun ba avaliasaun orsamentu 2024 nian inklui prosesaun atividade dezempenhu Radio Komunidade 2025
“Ami ohin konkorda malu ona, orientasaun neebe ami fo katak, iha 2025 Radio Komunidade hotu iha munisipiu tomak tenke halo relay ba iha notisia kalan husi RTTL, E.P, sira tenke obrigatoriu halo relay notisia neebe fo sai husi RTTL, E.P, dader meudia kalan. Depois sira iha mos nia programa espesial iha munisipiu idak-idak nian atu halo notisia, aleinde notisia tetun sira halo mos notisia lian materna hanesan fataluku nia, makasae, galolen, kemak, bunak, tokodede no seluk tan,” dehan nia ba jornalista sira iha Salaun Fundasaun Alola, Tersa (18/03/2025).
Nia haktuir, notisia neebe RTTL, E.P fo sai iha dader, meudia no kalan, sira implementa hahu daudaun ona, tinan 2025 sira balu hahu ona, ohin sira promete atu hahu hotu ona halo relay ba notisia RTTL, E.P, tinan 2025 nee atu uza mos lian materna iha sira nia notisia iha Radio Komunidade idak-idak nian tuir munisipiu ne’ebe iha.
“Iha mos uzu lian materna iha notisia neebe iha Radio Komunidade nian atu halo saida, tamba bainhira komunidade ida ka povu ida sente nia lian rasik nia rona nia sentidu pertensia ba iha radio ida nee bele akompanha informasaun neebe ho nia lian rasik, atu sente katak radio nee hau nian, tanba nee Radio Komunidade,” nia esplika.
Nia dehan, ohin halo enkontru ho jestor Radio Komunidade sira husi munisipiu hotu-hotu atu bele halo avaliasaun orsamentu neebe durante nee SEKomS transfere, oinsa sira bele halo sira nia konta responsabilidade no hatoo sira nia relatoriu avaliasaun.
“Ami halo mos prosesaun ba iha atividade iha tinan 2025 nian nomos difikuldade no dezafiu neebe mak sira hasoru, oportunidade neebe sira hetan durante sira halao sira nia atividade hanesan jestor ba iha Radio Komunidade,” tenik nia.
Iha fatin hanesan, Jestor Radio Komunidade Maubisi Mauloko, Joaquim Fatima Coutinho informa, hanesan Radio Komunidade politiku saida mak Governu nian liu husi SECOMS, husu Radio Komunidade sira halo kobertura ba iha lian materna sira oinsa atu halo tradusaun tetun ba fali lian materna hanesan, Mambae Fataluku, Kemak, Bunak, Tokodede no seluk tan bele, maibe difisil tanba iha Radio Komunidade sira la iha ema peritu sira konaba lian ka linguistika sira, entaun susar tebes.
“Maske hanesan nee, maibe ita koko took tanba iha radio atu halo programa sira kona-ba lian materna nee mak ita bele halo hanesan drama radio sira nee bele. Maibe notisia nee difisil oituan, maibe ita koko nafatin oinsa iha ninia titulu notisia ita bele hakerek ho tetun, maibe iha fontes de entrevista nee ho lian materna, entaun ita bele insert deit lian materna nee ba iha audiu, nunee ita bele fo sai, tanba nee bele difisil maibe ita labele mate ho difisil nee, ita buka meius oinsa para atu bele buka seluk hodi bele atinji ida ne’e,” dehan nia.
(EST 4)
