DILI, STLTIMORLESTE.com – Sekretariu Estadu Komunikasaun Sosial (SEKOMS), Expedito Dias Ximenes ho Prezidente RTTL, Rosario da Graca Maia relata progresu kontrusaun edefisiu RTTL ba Prezidente Republika Jose Ramos Horta.
Bainhira remata hasoru malu, SEKOMS Expedito Dias Ximenes ba jornalista sira iha Palasiu Prezidensial Nicolau Lobato, Bairo Pite, Sesta nee (06/03/2026) hatete, ohin hamutuk ho Prezidente RTTL mai hasoru malu ho Prezidente Republika Jose Ramos Horta, hodi relata progresu konstrusaun edefisiu RTTL ba Xefe Estadu.
“Hau ho Prezidente RTTL ami rua mai hasoru Prezidente Republika, ami hatoo kona-ba prosesu no progresu konstrusaun edifisiu RTTL, neebe hanesan ita hotu hatene katak iha fulan barak nia laran paradu, prosesu agora lao fila fali no hodibainrua UNDP hatoo ona dezenhu foun ba konstrusaun edifisiu RTTL nia neebe aprovadu tiha ona husi Ministeriu Obras Publika atu halo konstrusaun fila fali,” katak Sekretariu Estadu Komunikasaun sosial.
Expedito hatete, husi ohin ba oin Prezidente Republika informadu ba prosesu ida nee, ho dezenhu foun neebe UNDP halo no hetan ona aprovasaun husi Ministeriu Obras Publikas, no konstrusaun RTTL sei hahu fila fali nia prosesu. iha fulan ida nee halo fali re-tender tantu halo konkursu internasional.
Konkursu internasional nee hanesan mos halo iha tinan liu ba, sei halo durante fulan 16, signifika katak edifisiu RTTL sei hotu iha fulan Setembru 2027 sei entrega ba Governu.
“Ohin ami mai informa ba Prezidente para iha mos konhesimentu, tanba Prezidente mos apoiu ba iha servisu liu-liu ba iha orsamentu apoiu Grand neebe Governu Japaun fo ba RTTL atu bele halo konstrusaun nee liu husi ezekutor, katak liu husi UNDP mak sai jestor ba projetu nee, Prezidente Republika iha momentu neeba asiste mos bainhira halo kontratu entre Governu Japaun ho UNDP nomos RTTL nee mak ohin ami mai informa, ami mos husu Prezidente nafatin kontinua bele fo apoiu, ho Prezidente nia vizita ba Japaun no Korea kontinua husu apoiu ba RTTL nia edifisiu nee ba oin liu-liu hanesan oinsa ekipamentu neebe sei tau edifisiu neebe sei hotu iha 2027,” katak SEKOMS.
Nia hatete, projetu nee apoiu orsamentu husi Governu Japaun jere husi UNDP, no prosesu nee lao iha 2024, paradu iha fulan 6 nia laran, agora ba oin hahu fali.
Sekretariu Estadu hatete, mai informa deit ba Prezidente no Xefe Estadu para servisu nafatin hamutuk ho UNDP, tanba UNDP mak hanesan jestor impelementador ba projetu nee, Governu monitoriza deit tanba Primeiru Ministru Kay Rala Xanana Gusmão mak halo lansamentu primeira pedra.
No UNDP promete ona ba Governu no RTTL katak sira sei hahu re-tender iha fulan Marsu ou inisiu fulan Abril.
Mezmu nunee, orsamentu neebe Governu Japaun apoiu hodi halo kontrusaun edifisiu RTTL ho orsamentu total 5.9 milhões, no ida neebe mak implementa projetu nee UNDP, la liu husi Governu TL.
“UNDP iha osan nee nia laran iha mos osan neebe fo formasaun ba jornalista sira, maizumenus 100 mil, osan pedidu husi SEKOMS husu UNDP atu fo formasaun ba jornalista nee entrega ba Konselhu Imprensa, no Konselhu Imprensa halao ona knaar no fo formasaun jornalista 106 pesoas relatoriu mos Konselhu Imprensa halo ona ba UNDP no SEKOMS, no agora mak prosesu re-tender nee ba iha segundu faze, tanba empreza neebe antes halo nee retira ona tanba laiha kapasidade halo tanba ita hotu hatene rai Kaikoi bee barak, tanba nee empreza husi Indonezia rejigna tiha tanba nee tenke halo prosesu foun” katak nia.
Iha hasoru malu nee Prezidente RTTL, Rosario da Graca Maia husu Prezidente Republika kontinua lidera Host Programa Horta Show ho programa foun ida husi RTTL kona-ba programa patriota.
Ho ide nee Prezidente Republika Jose Ramos Horta resposta katak, prontu kontinua ho programa Horta Show iha RTTL nomos sei hola parte iha programa patriota.
Prezidente Republika mos rekomenda katak RTTL hanesan kanal ofisial estadu nian nafatin haree liu ba iha lian povu sira nia iha merkadu no area rural sira, no halo kobertura barak liu iha area sira nee no konvida povu kiik sira hola parte iha programa sira iha RTTL, no prezidente nafatin apoiu RTTL bainhira halo serbisu vizita ba rai liur husu apoiu ba RTTL nia funsionamentu ba oin.
(eme)
