DILI, STLTIMORLESTE.com – Sekretariu Estadu Kooperativas (SEKoop) distribui motorizada 32 ba Koordenador SEKoop iha munisipiu 13, hodi halao servisu iha munisipiu sira.
Koordenador SEKoop Munisipiu 13 mak hanesan Aileu motorizada 3, Bobonaro motorizada 5, Kovalima motorizada 5, Dili motorizada 3, Lautem motorizada 3, Likisa motorizada 2, Manatuto motorizada 6, Manufahi motorizada 2, Oekusi motorizada 3 no Munisipiu 3 mak la marka prezensa mak Ermera, Ainaro no Baukau.
Nia dehan, nee kompromisu OJE ba 2024, iha prosedur fahe motorizada nee para atu kompleta Koordenador SEKoop iha munisipiu nee fahe kada postu motorizada ida, tanba anteriormente motorizada iha maibe la kompletu, tanba kooperativa nia servisu barak liu iha area rural no suku sira, dala ruma fatin balun neebe kondisaun ladun diak.
“Tanba nee ami planeia sosa motorizada iha tinan nee 32 unidade para fo koordenador sira kada postu para halao servisu kooperativa nian, tanba nee ohin nee hau fahe kedas motorizada ba Koordenador Munisipiu,” hatete Sekretariadu Estadu Kooperativas (SECoop), Arsenio Pereira da Silva ba jornalista sira iha Kuluhun, Segunda nee (21/10/2024).
Governante nee dehan, distribui motorizada nee entrega kapasete nomos xave ba sira para utiliza ba servisu ho responsabilidade. Orsamentu rihun US$ 91 ba motorizada ida nee, maibe osan la uza hotu, nunee orsamentu ba motorizada 32 ho montante rihun US$ 73, no osan neebe sei iha rihun US$ 28.
Nia dehan, fahe motorizada nee Munisipiu 3 la marka prezensa mak hanesan Ermera, Ainaro ho Baukau, sira la mai entaun la nesesita motorizada diak hela nee mak sira la mai nee, entaun Munisipiu 10 mak simu hodi halao servisu SEKoop nia iha Munisipiu.
Iha fatin hanesan, Koordenador SEKoop Munisipiu Lautem, Aurelio da Silva dehan, parte munisipiu presiza tebes transporte atu utiliza halo atividade servisu nian iha nivel postu sira, tanba liga area produsaun nee motorizada nesesariu para apoiu funsionariu destaka iha munisipiu utiliza hodi halao atividade servisu.
(joa)
