DILI, STLTIMORLESTE.com – Sekretariu Estadu Formasaun Profisional no Empregu (SEFOPE), Rogério Araújo Mendonça hatoo keixa ba iha Ministeriu Publiku (MP) hasoru Komisariu Adjuntu Apoiu Kooperasaun Komisaun Anti Korupsaun (KAK), Miguel Acasio Farria.
“Hatoo keixa neebe mak Adjuntu Komisariu Servisu Apoiu Kooperasaun, Miguel Acasio Faria halo persegisaun politika mai hau, no mos desfama hau iha Munisipiu Aileu, hau mai iha fatin ida nee atu divulga informasaun balu ba iha publiku, hau hatoo ba publiku hau halo ona konsultasaun no konhesimentu ba iha hau nia superior hodi mai hato keixa hasoru Miguel Acasio Farria,” dehan nia ba jornalista sira iha MP, (Kuarta 18/06/2025).
Nia hatutan, iha loron Kinta, Miguel Acasio Farria ba iha SEFOPE Munisipiu Aileu, la lori karta ofisial ruma husi KAK, uza nia kompetensia hanesan Adjuntu KAK hodi ba husu lista prezensa iha Diretor no funsionariu nain 2 no funsionariu no Diretor sira fornese dadus, ida nee kompetensia KAK nian la halo intervensaun ba ida nee.
Nia sublina, depois Miguel sai husi edefisiu atu kontinua nia viajen, nia hateten ba Diretor SEFOPE Munisipiu Aileu no funsionariu nain rua katak, hatoo hela “hau nia komprimentus ba Sekretariu Estadu SEFOPE, hatoo mos hau nia komprimentus ba PAM Aileu, dehan sira nain rua kuandu servisu naok osan Governu nian, hatene ho hau Miguel Acasio Farria Adjuntu KAK nian,” dehan nia.
Esplika tan, KAK seidauk notifika nia ida, fo deit karta ida atu ba presta deklarasaun mos seidauk iha, samada deit mos la iha, maibe Miguel dehan fali nia naok osan Estadu nian nee oinsa. No konsidera Miguel hanesan adjuntu laos ema neebe mak tuir selesaun por meritu, maibe nia nomeasaun husi Komisariu signifika katak nomeasaun konfiansa.
Nunee servisu sira tekniku nee delega ba Diretor Jeral no Diretor Nasional Xefe Departamentu ida nee mak bele halao funsaun sira nee.
Afirma, agora la gosta deit nia, ba halo ona iha administrasaun sira nee lori tan mai iha SEFOPE hodi dehan, Sekretariu Estadu SEFOPE halao servisu didiak, kuandu naok osan Governu nian hatene ho nia Miguel hanesan Adjuntu KAK.
Reforsa, ida nee hanesan ameasa ida ba nia nuudar membru IX Governu, tanba nee mak ba iha Ministeriu Publiku hodi hatoo keixa. No husu iha MP atu loke investigasaun hasoru Miguel. Konsidera Miguel laos ema funsionariu neebe kaer memoria instituisional iha KAK nee la iha, nia hetan nomeasaun por konfiansa.
Tanba nee labele uza konfiansa nee hodi halo persegisaun politika ba membru Governu ida nee labele. Iha loron 16 banhira rona informasaun nee, no kontaktu ba iha Miguel hodi husu tanba dehan nia naok osan Estadu, no Miguel dehan ba Sekretariu Estadu halo intervensaun servisu KAK nian. Maibe Sekretariu Estadu dehan, la halo intervensaun ba servisu KAK nian, maibe husu justifikasaun tanba sa koalia hanesan nee, tanba ema nain tolu nee prontu sai sasin iha MP no Tribunal.
“Hau husu ba Komisariu KAK atu suspende ema ida hanesan Miguel Acasio Farria tenke suspende, tanba nia halo nia aktu nee hasoru membru Governu, hau laos Rogerio mai ho titulu Governu nian hau laos Rogerio mak mai hatoo, maibe hanesan membru Governu. Tanba nee husu KAK suspende nia, hodi loke investigasaun ba iha Ministeriu Publiku hodi lori ba iha Tribunal.
Husu mos ba iha MP atu aselera kazu ida nee, ita nia rain ukun aan ona no KAK nia ezistensia forsa ba beibeik, se iha ema ida nunee hakarak estraga instituisaun nee tanba nia interese.
Aleinde nee iha sorin seluk Akademiku UNTL Rafael de Jesus dehan, ema hotu bele hatoo keixa, kuandu sente iha buat balu neebe ofende sira. Maibe atu deside prosesu nee lao ba oin ka lae, ida nee kompetensia MP nian.
(ter)
