DILI, STLTIMORLESTE.com – Reprezentante Espesial Sekretariu Jeral ONU Ba Asuntu Violensia Kontra Labarik, Najat Maala M’Jid hasoru malu ho Prezidente Republika, Jose Ramos Horta, hodi diskute oinsa bele hapara violensia hasoru labarik iha Timor Leste.
Bainhira remata hasoru malu, Reprezentante Espesial Sekretariu Jeral ONU Ba Asuntu Violensia Kontra Labarik, Najat Maala M’Jid ba jornalista sira iha Palasiu Prezidensial, Nicolau Lobato, Bairo Pite, Kinta nee (06/03/2025) hatete, hasoru malu ho Prezidente Republika nee loron ikus hodi koalia kona-ba oinsa bele hapara violensia kontra labarik iha Timor Leste.
Objetivu husi vizita ida nee hanesan vizita ba loron ikus nia hodi informa ba Prezidente kona-ba atividade hotu neebe mak halo iha nee, no Prezidente mos sente kontente tebes kona-ba komitmentu politika Estadu Timor Leste nia intermus oinsa mak bele hakotu violensia iha Timor Leste nomos sublina mos katak presiza investimentu Governu no Estadu Timor Leste nomos oinsa mak haree servisu diak neebe mak halo tiha ona atu kontinua haree bem star labarik nia nomos oinsa mak haree atu hakotu violensia kontra labarik iha Timor Leste,” katak nia.
Nia hatutan, durante iha Timor Leste hasoru malu ho entidade barak hodi koalia asuntu liga ho violensia neebe labarik sira hasoru.
“Hau hasoru malu ho entidade barak hodi koalia kona-ba preokupasaun liga ho violensia hasoru labarik sira, ida nee sai preokupasaun boot, no bolu atensaun oinsa mak bele servisu hamutuk hodi hapara violensia hasoru labarik,” katak nia.
Nia dehan, Timor Leste hanesan mos Estadu neebe parte ratifika ona konvensaun direitus labarik, ida nee sai hanesan prinsipiu ida neebe Estadu Timor Leste tuir nomos definisaun kona-ba direitu labarik nia iha konvensaun direitus labarik Estadu Timor Leste nia obrigasaun oinsa mak bele garante iha realizasaun iha direitu sira nee.
“Iha direitu barak neebe mak iha konvensaun direitu labarik hatete, ezemplu direitu atu hetan identidade, asesu ba saude, asesu ba edukasaun, asesu ba moris diak, ida nee mak tenke implementa,” katak nia.
Nia dehan, definisaun kona-ba violensia nee hanesan sumrinha neebe boot tebes, no definisaun violensia mak hanesan labarik sira hasoru violensia fiziku, emosional, ekonomiku, abuzu seksual nee mak definisaun.
Importante bainhira haree labarik ida hetan abuzu entaun signifika katak afeita hotu neebe akontese ba labarik presiza haree hodi bele rezolve.
(eme)
