DILI, STLTIMORLESTE.com – Selebra aniversariu Administrasaun Portuariu Timor Leste (APORTIL) ba dala 22, funsionariu sira APORTIL halo doasaun raan, hodi tulun ema moras neebe presiza.
Haktuir Vogal II Konselhu Administrasaun APORTIL, Leandro de Sena ba jornalista sira iha Portu Dili, Tersa (25/03/2025).
“Ambitu komemorasaun APORTIL iha loron 10 Marsu ba dala 22 hafoin Timor Leste restaura independensia, atividade neebe ami realiza kuda ai oan iha Lahatene Osidental, hodi matak ita nia rain no foho, segundu doasaun raan hakarak ajuda ema moras sira neebé presiza raan,” dehan nia.
Nia dehan, banku de sangue mos hasoru difikuldade kona-ba raan, tanba nee aproveita selebrasaun APORTIL halibur funsionariu, liu-liu ba sira neebe kondisaun diak bele oferese sira nia raan.
Tanba ho doasaun raan hodi tulun HNGV no maluk sira neebe moras iha hospital presiza raan, ida nee mak objetivu ba atividade ohin loron nian.
Doasaun raan nee husi funsionariu APORTIL, tuir lista nain 20 maibe ohin ema balu aumenta bele ema nain 25 ou 30, sente kontente sira bele kontribui.
Iha fatin hanesan, Xefe Interina Departemen Banku de Sangue, Maria do Rosario Aleisa Berek dehan, ohin husi banku de sangue sei hasai raan tuir kriteria neebé iha.
“Ohin loron ami husi HNGV liu husi Banku de Sangue halao doasaun raan iha fatin nee ami sei hasai raan tuir kriteria neebe iha, katak ba sira neebe tama kriteria hasai raan bele apoia ba pasiente neebe presiza. Tanba ita hatene realidade iha HNGV pasiente barak presiza tebes raan, tan ami agradese tebes, iha biban nee ba APORTIL neebe halo ona doasaun raan bele salva pasiente barak,” nia tenik.
Nia dehan, kriteria haree ba ema nia kondisaun nia fiziku saudavel, iha saude mental nomos fiziku, nia laiha moras ruma, nia la. konsumu aimoruk ruma bele afeita ba iha kualidade raan, nia tenke deskansa oras 8 nia laran, nia deskansa ho diak bele doasaun raan.
(joa)
