DILI, STLTIMORLESTE.com – Prezidente Republika (PR), Ramos Horta selebra desizaun istoriku adezaun ASEAN nian no kondekora Embaixador Brunei ba Timor Leste ho Kolar Orden Timor Leste.
Bainhira remata kondekora, Prezidente Republika Jose Ramos Horta ba jornalista sira iha Palasiu Prezidensial Nikolao Lobato, Bairo Pite, Kuarta kalan (28/05/2025) hatete, ohin prezidensial hamutuk ho embaixador sira ASEAN hodi hatoo agradese ba sira nia apoiu ba apoiu Timor Leste adere ba ASEAN, no loron importante nee kondekora mos Embaixador Brunei Darussalam ba TL.
“Aban hau aranka ba Singapura, entaun halo eventu simples ida nee iha prezidensia para hamutuk ho embaixador sira ASEAN agradese ba sira hotu-hotu ba sira nia apoiu ba ASEAN, nasaun sira ASEAN neebe tinan 20 nia laran sempre hamutuk ho ita durante periodu neebe susar sira sempre marka prezensa para mos despedida Embaixador Brunei iha tempu badak fila ba Brunei remata nia mandatu iha nee kondekora nia ordem de Timor Kolar, tanba nia hanesan embaixador sira seluk hau sempre buka rekonhese tanba sira reprezenta sira nia nasaun, reprezenta sira nia Xefe Estadu, tanba nee mak ohin halo enkontru informal iha nee ho deit embaixador sira ASEAN nia, dehan PR Horta.
Prezidente Republika Jose Ramos Horta sai uma nain ba Cocktail informal ida ba Embaixador sira ASEAN nian hodi komemora desizaun istoriku ba admisaun Timor Leste nuudar membru membru ASEAN ba dala 11.
Durante serimonia nee, Prezidente Republika Jose Ramos Horta kondekora Kolar Orden Timor Leste neebe prestijiozu ba Wan Hadfi Lutfan bin Haji Abdul Latif, Embaixador Extraordinariu no Plenipotentsiariu Brunei Darussalam mai Timor Leste. Serimonia nee halo iha Salaun ASEAN, Palasiu Prezidensial Nicolau Lobato.
Selebrasaun nee realiza hafoin deklarasaun importante husi Prezidente ASEAN nian neebe fo sai iha Simeira ASEAN ba dala 46, iha Kuala Lumpur, Malazia, iha loron 26-27 fulan Maiu tinan 2025, neebe anunsiu ofisialmente desizaun koletiva Lider ASEAN sira hodi admite Timor Leste nuudar Estadu membru organizasaun nian ba dala 11. Adezaun kompletu sei formaliza iha Simeira ASEAN ba dala 47 neebe programa ona ba fulan Outubru 2025.
Realizasaun ida nee reprezenta kulminasaun dekada lima liu husi empenhamentu diplomatiku, hahu ho Prezidente Republika Ramos Horta nia diskusaun inisial ho Ministru Negosiu Estranjeiru Indonezia nian, Adam Malik, iha Jakarta iha tinan 1974, no formaliza liu husi karta intensaun Timor Leste nian atu adere ba ASEAN iha tinan 2011.
Prezidente Republika hatete, admisaun nee reprezenta konkretizasaun mehi ida neebe hahu liu tinan 50 liu ba no reflete dedikasaun metin husi lider Timoroan sira, molok no agora, neebe fiar ba vizaun ASEAN nian.
“Ohin, ita selebra laos deit ita nia admisaun, maibe ita nia kompromisu atu servisu makaas liu tan bainhira ita prepara atu kontribui ba komunidade ASEAN nia prosperidade komun no estabilidade rejional.” Katak Horta.
Prezidente Republika Ramos Horta kondekora Kolar Orden Timor Leste nian ba Embaixador Extraordinariu no Plenipotentsiariu Brunei Darussalam mai Timor Leste, Wan Hadfi Lutfan bin Haji Abdul Latif, nuudar rekonhesimentu ba ninia servisu diplomatiku esepsional dezde aprezenta karta kredensial iha loron 15 fulan Julhu 2020.
Iha Embaixador Wan Hadfi nia mandatu, relasaun bilateral entre Timor Leste ho Brunei Darussalam hetan progresu neebe laiha presedente liu husi vizita estadu resiproku entre Sua Majestade Sultan Brunei nian ho Prezidente Republika Jose Ramos Horta, interkambiu ministerial estratejiku sira, no asinatura akordu importante sira neebe kobre servisu aereu, rekrutamentu trabalhador, no ezensaun vistu.
Realizasaun notavel sira durante nia mandatu inklui reforsa kooperasaun iha ensinu superior atraves projetu revizaun politika TVET SEAMEO VOCTECH nian, kolaborasaun kuidadu saude nian neebe rezulta iha akreditasaun provizoriu ba Sentru Mediku Dili, habelar parseria setor privadu nian neebe aumenta neebe lidera husi kompania sira hanesan Daikyo Industrial Gas, no partisipasaun inaugural Timor Leste nian iha Konsellu Negosiu BIMP-EAGA.
Xefe Estadu dehan, Embaixador Wan Hadfi Lutfan exemplifika tradisaun diplomasia neebe diak liu husi nia servisu dedikadu hodi hametin ligasaun entre Timor Leste ho Brunei Darussalam.
Nia esforsu sira iha tinan rua nee kria ona fundasaun ba kooperasaun neebe sei benefisia ita nia povu rua ba jerasaun sira tuir mai.” Katak nia.
Prezidente Ramos Horta hatoo agradesimentu profundu ba Estadu membru ASEAN hotu-hotu ba sira nia solidariedade no apoiu neebe metin durante jornada adezaun Timor Leste nian, no mos ba parseiru dezenvolvimentu sira ba sira nia kompromisu kontinua.
Timor Leste agora prontu atu asumi nia responsabilidade tomak nuudar membru ASEAN no kontribui ho signifikativamente atu hodi harii Komunidade ASEAN neebe unidu, pasifiku, no reziliente.
(eme)
