DILI, STLTIMORLESTE.com – Selebra loron aniversariu São Jose, Alumni Colegio São Jose servisu hamutuk ho Banco de Sangue Hospital Nasional Guido Valadares (HNGV) Dili, halibur alumni sira ho komunidade iha Dili, halao asaun doasaun raan ba maluk sira neebe mak moras iha hospital presiza raan, nunee too loraik konsege oferese raan plastiku 10 ba HNGV.
Tuir Komisaun Organizador Doasaun Raan husi Alumni Colegio São Jose, Efrem dos Anjos nuudar Alumni Kolegio São Jose tinan 1985 ba STL iha Salaun Yayasan Hak Farol, Dili, Sabadu (22/03/2025) katak, selebrasaun loron aniversariu São Jose, Alumni Kolegio São Jose tinan nee realiza ho atividades tolu, primeiru selebra ho misa agradesimentu, segundu halao asaun karitativa hanesan fo apoiu ai-haan ba maluk sira neebe presiza nesesidade bazika no halao mos asaun doasaun raan turuk ida husi maluk alumni São Jose nomos komunidade sira oferese raan ba maluk sira iha HNGV neebe presiza raan.
“Kada tinan ami husi alumni Colegio São Jose sempre halibur hamutuk hodi selebra loron importante nee no tinan nee ami halao liu husi misa agradesimentu, segundu halao asaun karidade fornese ai-haan ba maluk sira neebe presiza no terseiru mak liu husi asaun karidade doasaun raan neebe mak ohin ami hamutuk ho HNGV nomos alumni sira kongese oferese raan plastiku 10 ba HNGV,” dehan nia.
Nia haktuir tan katak, asaun sosial ida nee alumni husi Colegio São Jose halo beibeik kada tinan, aleinde komemora loron São Jose nian ho misa neebe mak iha loron 19 Marsu loron 2 liu ba, asaun karidade sosial liu husi apoiu ai-haan ba maluk sira nomos doasaun raan.
“Ba maluk Alumni Kolegio São Jose sira hotu katak, ohin loron ita oferese ita nia raan turuk ida ba maluk sira neebe mak presiza nomos asaun sosial neebe hola parte hanesan ita nia moto ida, katak sai ema ba ema seluk, katak sai feto no mane ba ema seluk. Ita esperansa katak, ho atividade ida nee bele halo ita hamutuk nafatin, katak atu sai ema liu husi edukasaun neebe mak uluk ita hetan, ida nee edukasaun ba ema seluk, entaun asaun sira hanesan nee nuudar asaun konkreta hodi hatudu ba ita nia maluk sira katak, A to be me and for awards, mak ida nee laos ita hanoin deit ba ita nia aan, maibe hanoin mos ba ema seluk,” dehan nia.
Iha biban nee, nia konta istoria Colegio São Jose katak, harii husi Dioseze Dili iha 1983 too 2013, eskola nee agora laiha ona, maibe ninia alumni sira nee sei iha. Iha prosesu harii eskola nee husi Amu Diosezanu sira mak kaer eskola nee, ho naran Santu Yosep, depois husi tinan 1993, transfere husi Dioseze ba Padre Jezuita sira mak jere fali eskola nee, too tinan 2013, husi ezistensia eskola nee kuaze alumni alunus too tinan 2013, alumni alunus hamutuk 2.500 alunus neebe mak produs husi Colegio São Jose Balide, ho padre Jezuita sira nia edukasaun, hetan oportunidade barak hodi servisu iha fatin-fatin.
Iha tempu rezistensia Alumni husi Eskola Santo Yosep mos hola parte importante iha istoria luta libertasaun nasional Timor Leste nian liu husi Frente Klandestina nomos enkontru lubuk ida neebe mak sira halo iha Colégio São Jose no iha momentu neeba, Bapa sira fo linha mean ba eskola ida nee, too revolta iha masakre 12 Novembru 1991, tanba membru barak husi masakre nee mai husi alunus Colégio São Esternato nomos balu husi Colégio São Jose iha tempu neeba iha colégio ida nee.
“Mensajen neebe importante, liga ho espiritu São Jose ba alumni sira hahu husi tinan 1983 mai too ohin loron, Mahein São Jose nee ema servisu nain, tanba nee ita tenke refleta iha ita nia aan atu kontribui fali ho ita nia matenek husi edukasaun neebe ita aprende iha Colégio São Jose too ohin loron, para kontribui fali ba iha sosiedade ida nee, tanba sosiedade ida nee presiza ita nia tulun, ohin ita konsege hetan buat barak tanba intervensaun husi Maromak liu husi espiritu São Jose nian,” dehan nia.
Iha oportunidade hanesan, Zodania nuudar komunidade sira husi Dili neebe mak.organiza husi komisaun alumni Colégio Sao Jose hola parte oferese raan turuk ida salva maluk sira iha HNGV katak, sira hanesan komunidade baibain, laos alumni mai ho alumni sira husi Colégio São Jose no HNGV oferese raan turuk ida ba maluk sira neebe mak presiza.
“Ami hanesan komunidade baibain mai hamutuk ho Alumni Colégio São Jose ho HNGV oferese ami nia raan turuk ida ba maluk sira neebe presiza raan turuk ida ba iha hospital. Agora mos tempu kuarezma, entaun ita tenke hanoin netik ita nia maluk sira neebe mak iha hospital, ita bele oferese ita nia raan, karik bele ajuda sira,” haktuir nia.
Nunee mos Fatmawati Atilia nuudar komunidade baibain dehan, foin primeira vez hasai raan turuk ida ba maluk sira neebe mak presiza.
“Hau foin primeira vez hasai hau nia raan ba maluk sira neebe mak presiza raan, hau espera katak ho doasaun hau nia raan nee bele ajuda ba iha kualker ema sira neebe mak presiza tipu raan hanesan ho hau,” dehan nia.
Nia haktuir tan katak, Colégio São Jose ho HNGV sira nia asaun nee diak tebes, tanba dala ruma maluk sira balu neebe uluk eskola iha Colégio São Jose, sira bele kontribui aan, oferese sira nia raan ba ema neebe mak presiza, tanba nee ba maluk sira husi eskola seluk bele aprende husi alumni Colégio São Jose atu sira bele koordenasaun ho HNGV, nunee sira mos bele oferese sira nia raan turuk ida salva maluk sira nia vida iha HNGV.
Iha oportunidade hanesan, Agustinha Alves nuudar Mediku iha Banco de Sangue HNGV dehan, atividade doasaun raan nee laos foin primeira vez halao maibe HNGV sempre servisu hamutuk ho Cruz Vermelha Timor Leste nomos organizasaun internasional sira nomos organizasaun oin-oin iha nasaun TL hodi mobiliza maluk sira atu oferese sira nia raan turuk ida salva maluk sira neebe mak presiza raan no moras iha hospital.
“Ohin ita hamutuk tan ho alumni sira husi Colégio São Jose, hodi halao asaun doasaun raan, ida nee hanesan atividade ida neebe mak diak tebes-tebes atu apoiu raan turuk ida ba maluk sira neebe mak presiza raan iha HNGV, liu-liu sira neebe mak partus iha hospital nomos labarik barak neebe mak oras nee moras dengue barak iha hospital, tanba nee maluk alumni sira nomos komunidade sira ohin mai ho voluntariamente fornese sira nia raan ba maluk sira neebe mak presiza raan atu salva sira nia moris,” dehan nia.
Responde kona-ba stok raan iha Banco Sange, daudaun nee stok raan sufisiente hela atu atende maluk sira neebe mak presiza raan nomos ba pasiente hirak neebe mak mai atu fase raan ninian, parte Banco de Sangue HNGV prontu ajuda sira ho stok raan neebe mak iha.
“Ba maluk sira neebe mak durante nee seidauk hakbesik aan ho parte Banco de Sangue no fatin sira neebe mak ami sempre halibur malu hodi oferese sira nia raan turuk ida atu salva maluk sira iha hospital, husu atu labele tauk hodi hasai raan no tauk atu hasai raan ba maluk sira neebe mak presiza, ita tenke konsiente katak ita ajuda ema seluk liu husi raan turuk ida hodi salva ema seluk nia vida,” dehan nia.
Tuir observasaun STL iha edifisiu Yayasan Hak, Alumni sira husi Colégio São Jose nomos komunidade balu ho voluntariamente oferese sira nia raan turuk ida liu husi Banco de Sange iha ambitu doasaun raan neebe mak realiza iha Dili, organiza husi alumni Kolegio São Jose servisu hamutuk ho HNGV ba aniversariu loron aniversariu Colégio São Jose iha tinan 2025.
(jos)
