BOBONARO, STLTIMORLESTE.com – Relasiona ho loron FALINTIL ba dala 50 neebe sei selebra iha loron 20 Agostu 2025, estudante sira husi Eskola Sekundaria Jeral nu. O1 Dom Martinho da Costa Maliana, ETA Moleana, Colegio Infante de Sagres Maliana nomos sira seluk realiza marsa Caravana.
Visi Prezidente Komisaun Organizadora, Atual Sekretariu Autoridade Munisipiu Bobonaro ba Asuntu Sosiais, Julio Carvalho Caero dehan, relasiona ho loron FALINTIL ba dala 50 neebe selebra iha Munisípiu Maliana, tanba nee iha aktividade lubuk ida maka halao ona horseik no ohin.
“Atividade ida mak hanesan marsa Caravana neebe ohin ita nia estudante sira halao ona, depois kompetisaun ba koru, poizia, atividade apoiu ba ema kbi’it laek sira, tanba nee ami hanoin atividade lubuk ida mak ami halao tiha ona,” hatete nia ba jornalista sira iha Gor Maliana, Segunda (18/08/2025).
Nia esplika, marsa Caravana neebe halao husi Ritabou too mai Maliana Vila, nee halo husi estudante Sekundaria too Ensinu Baziku sira. Atividade nee relasiona ho loron FALINTIL neebe monu iha 20 Agostu 2025.
Nia informa, komemorasaun nee fo hanoin ba juventude Munisípiu Maliana atu hanoin hikas ba luta nain no eroi sira, durante tinan barak nia laran hodi defende independensia Timor Leste (TL)
“Ita nia Estudante sira halao marsa Caravana nee husu para viva FALINTIL, viva Forsa Armadas, ita husu labele uza linguajen neebe ladiak,” nia deklara.
Iha biban nee nia husu nafatin ba juventude sira, uza tempu nee ho diak, tanba joven sira mak sei kontinuasaun ba RDTL, liu-liu ba Munisípiu Bobonaro.
Iha fatin hanesan Estudante Cristal João Gusmão Martins informa, loron FALINTIL nee importante tebes ba joven Munisípiu Bobonaro, tanba nee mak selebra loron FALINTIL nee ho atividade marsa Caravana no atividade puizia nomos atividade sira seluk neebe povu Munisípiu Bobonaro prepara.
“Loron FALINTIL nee importante tebes-tebes ba ita atu hanoin hikas ba ita nia eroi sira no aman funu nain sira nia dedikasaun hodi hetan ukun rasik,” nia afirma.
(jen)
