DILI, STLTIMORLESTE.com – Prezidente Republika (PR) Jose Ramos Horta fo omanajen ba jornalista iha mundu tomak, neebe selebra loron Liberdade Imprensa.
Prezidente Republika Jose Ramos Horta hatoo kestaun nee ba jornalista sira bainhira remata vizita trabalhu nasaun Bulgaria ho Reinu Unido no fila hikas mai Timor- Leste, iha Aeroportu Internasional Nicolau Lobato, Komoro, Dili, Segunda (28/04/2025).
Prezidente Republika hatete, iha loron Liberdade imprensa nee Prezidente Republika fo omenajen ba Jornalsita iha mundu tomak tanba jornalista mos fo kontribuisaun makaas balun mate iha luta laran.
“Primeiru hanesan omenajen ba jornalista sira iha mundu tomak, iha tinan sira nia laran nee, liu-liu iha Gaja jornalista lubuk ida mak mate. Jornalista sira mate iha funu nee, bainhira militar ida mate, nee ita bele hatete inevitavel kuaze normal, tanba funu. Mas bainhira jornalista mate, bainhira ita hatene informasaun sira neebe halo funu nee target jornalista, hanesan target ema servisu umanitariu Nasaun Unidas ONG nee mak preokupa liu, iha opiniaun internasional,” katak PR Horta.
Xefe Estadu hatete, jornalista mos fo kontribuisaun makaas tanba jornalista mos mate iha funu laran, bainhira buka imformasaun.
“Ba jornalista sira neebe mate iha funu, mate tanba sira buka informasaun ba informa opiniaun publiku mundial, kumpri sira nia servisu, hanesan mediku ida, hanesan padre ida, ajensia ONU nee mak sira halo, Nee duni omenajen ba hotu-hotu, no omenajen ba jornalista iha Timor neebe imi tinan sira nia laran, kaer imi nia knaar ho korajen, ho integridade, onestidade, profisionalizm. Tanba nee mak tau mos Timor nia naran iha media freedom as tebe-tebes,” dehan Horta.
Iha biban nee Prezidente Republika enkoraza ba Jornalista Timoroan sira atu nafatin halao knaar ho integridade onestidade no professional hodi haklake lian laek sira nia.
(eme)
