BAUKAU, STLTIMORLESTE.com – Servisu Edukasaun Munisipal (SEM) Baukau seidauk simu relatoriu faze dahuluk nian ba implementasaun Programa Merenda Eskolar tinan nee.
Diretor Servisu Edukasaun Baukau, Afonso dos Santos da Costa esplika, implementasaun programa merenda eskolar tinan nee, iha Baukau faze dahuluk hahu iha loron 03 Fevereiru no remata iha loron 28 Marsu, maibe parte servisu Edukasaun Munisipal seidauk hetan relatoriu faze dahuluk nian, tanba ekipa seidauk aprezenta.
“Ninia atinjimentu nee kuaze eskola hotu lao diak, maibe ita hein ekipa neebe lao halo monitoring iha faze prepara relatoriu hafoin fo mai mak ita hatene nia atinjimentu nee too iha neebe,” hateten Afonso ba jornalista STL iha knaar fatin Trilolo, Baukau, Kuarta (02/04/2025).
Nia sublina, daudaun ekipa monitorizasaun prepara hela relatoriu iha Diresaun Planeamentu Munisipal no tuir planu sei aprezanta ba Prezidente Autoridade Munisipiu hafoin relata ba Servisu Edukasaun Munisipal hodi realiza enkontu hodi hatene atinjimentu fiziku orsamentu ba faze dahuluk nian.
Nia fundamenta, daudaun implementasaun programa merenda eskolar iha nivel eskola sei paradu, tanba ekipa seidauk relata relatoriu faze dahuluk nian ba Autoridade Munisipal, maibe sei aprezenta iha tempu besik, nunee implementasaun faze daruak bele kontinua.
“Buat hotu iha neeba ona, agora hein deit aprova, kuandu aprova ona, ita ezekuta kontinua kedas,” nia katak
Afonso akresenta, prosesu implementasaun faze daruak ekipa mos prepara ona planu no aprezenta ona ba Autoridade Munisipal hein aprovasaun garante sei implementa hikas iha fulan Abril nee, tanba orsamentu neebe aloka objetivu fo benefisiu ba estudante sira neebe asesu merenda eskolar.
Entretantu implementasaun programa merenda eskolar ba anu letivu 2025 iha Baukau ho aloka orsamentu hamutuk US$ 261. 990.00 ba eskola sira liu 230 hanesan pre-eskolar, ensinu baziku, kompostu privadu no publiku.
No benefisiariu ba programa refere iha Baukau estudante hamutuk 32.730, neebe kada loron estudante nain 1 han osan sentavus 0.42, no menu implementa iha programa refere 75% ho produtu lokal husi produtu sira hanesan ai-haan fo protesaun, haburas no ai-haan haforsa nian.
(tom)
