DILI, STLTIMORLESTE.com – Relasiona ho orientasaun Ministra Edukasaun ba Diretor Servisu Edukasaun Munisipiu sira atu fo informasaun ba eskola, hodi estabelese atividades estra kurikular liu husi kemping eskuteiru ba estudante sira.
Diretor Servisu Edukasaun Munisipiu Liquica, Julio da Silva hatoo lia hirak nee ba STL liu husi telefone, Segunda nee, (17/03/2025).
“Los duni katak, ami simu ona mensajen husi ministra liga ba atividades estra kurikular nian ba ita nian eskola sira, tanba nee husi Munisipiu Likisa nian ami fo ona informasaun ba ita nian eskola sira, oinsa halo preparasaun molok atu halao atividades ida nee, tanba nee ami presiza hetan resposta lai husi ita nian eskola sira, tanba ita nian eskola sira seidauk fo resposta mai ami kona-ba asuntu refere,” nia deklara.
Julio dehan, orientasaun ministra nian ba Diretor Edukasaun Munisipal sira nee simu ona no orientasaun liu husi mensajen nee hatoo direita ba eskola idak-idak, maibe tenke hetan resposta fali husi eskola sira.
Entretantu Ministra Edukasaun, Dulce de Jesus Soares orienta Diretor Servisu Edukasaun Munisipal atu estabelese atividades estra kurikular hanesan kemping eskuteiru iha eskola sira, ho nunee bele halao atividades ida nee iha eskola sira.
“ME konsidera ida nee ezemplu diak husi atividade estra kurikular ba estudantes no orienta ba Diretor Edukasaun Munisipiu sira atu estabelese atividades ida nee iha eskola sira, tanba ida nee hanesan atividades estra ida ba estudantes sira,” katak nia.
(jac)
