DILI, STLTIMORLESTE.com – Depois remata ezame nasional no lokal, kada Servisu Edukasaun husi kada Munisipiu (SEM) halo konfirmasaun ba kada eskola sira, hodi husu tuir kona-ba estudantes neebe atu tuir fali ezame segundu xamada ka susulan.
Tuir Diretor Servisu Edukasaun Munisipiu Ainaro, Patricio da Costa Magno katak, SEM Ainaro konfirmadu laiha estudante atu partisipa fali ezame susulan.
“Too agora inan aman estudantes sira nian ka husi eskola seidauk informa mai ami katak, iha estudantes neebe atu partisipa fali iha ezame segundu samada ninia. Depois de ezame nasional no ezame lokal, ami konfirma kedas ho parte eskola hotu neebe mak lokaliza iha Munisipiu Ainaro, laiha estudantes neebe atu tuir fali ezame susulan, nee laiha. No inan aman sira mos seidauk hatoo informasaun ruma mai ami,” dehan nia ba STL liu husi telefone, Kuarta nee (23/10/2024).
Nia dehan, kuandu estudantes neebe la konsege partisipa iha ezame rua nee, entaun sira bele hatoo ba iha eskola, husi eskola fo dadus ba iha Edukasaun Munisipal, ho nunee haruka ba iha Ministeriu Edukasaun liu husi diresaun kurrikulu ninia.
Iha fatin seluk, Diretor Edukasaun Munisipiu Likisa, Julio da Silva hatete, husi Munisipiu Likisa ninia, dadus estudantes husi Ensinu Sekundariu Jeral nain 2 mak sei tuir ezame susulan. Dadus nee depois de ezame sira haruka ona ba iha diresaun kurrikulu ME nian, para nunee estudantes sira nee tuir fali ezame susulan.
“Hau sente dadus estudantes nain rua husi Ensinu Sekundariu Jeral nain 2 mak sei tuir ezame susulan, dadus nee depois de ezame sira haruka ona ba iha diresaun kurrikulu ME nian, para nunee estudantes sira nee tuir fali ezame susulan,” nia dehan.
Nunee mos Diretor Edukasaun Mumisipiu Manatuto, Patricio da Cruz Quintao hatete, dadus kona-ba ida nee presiza halo konfirmasaun lai, no estudantes nain hira mak la partisipa iha ezame no tuir fali ezame susulan.
(jac)
