DILI, STLTIMORLESTE.com – Servisu Edukasaun Munisipiu (SEM) Vikeke husu ba estudantes hotu atu bele partisipa iha ezame terseiru periodu, neebe sei halao iha dia 17 Novembru tinan nee.
Tuir Diretor Servisu Edukasaun Munisípiu Vikeke, Julio Sacadura dehan, ohin SEM Vikeke halao enkontru ho parte Diretor no Koordenador sira, ohin mai hotu iha Edukasaun Munisipiu Vikeke no fo ona informasaun ba sira katak, Segunda semana ohin estudantes sira hahu halao ezame pasajen ninia.
“Neebe hau dehan katak, Profesor, Diretor no Koordenador sira hamutuk para halo preparasaun neebe diak ba iha ezame pasajen ninia, tanba iha loron Segunda semana oin ita nian estudantes sira halao ezame. Nuudar Diretor SEM Vikeke apela ba ita nian estudantes hotu katak, sira hotu tenke partisipa masimu iha ezame pasajen ninia, karik iha balun moras, husu Diretor no Koordenador sira buka dalan para bele kordena ho inan aman,” dehan Julio ba jornalista STL liu husi telefone, Sesta nee (14/11/2025).
Nia hatutan, durante nee estudantes sira partisipa ona iha prosesu ensinu aprendizajen, entaun materia hirak nee sira simu ona husi kada profesores ba disiplina idak-idak nian, nee duni aban no bainrua estudantes sira deskansa iha uma, nee aproveita estuda, atu nunee bele hetan valor neebe mak diak husi ezame pasajen ninia.
Jornalista: Jacinta Sequeira
Editor: Xisto Mendonça
