DILI, STLTIMORLESTE.com – Servisu Edukasaun Munisipiu (SEM) Manatuto sempre halo koordenasaun neebe diak ho dirijenti husi eskola hirak neebe lokaliza iha munisipiu refere.
Lia hirak nee hatoo husi Diretor Servisu Edukasaun Munisipiu Manatuto, Patricio da Cruz Quintao ba STL liu husi telefone, Kinta nee (20/03/2025).
“Nuudar Diretor Edukasaun iha munisipiu nafatin halo kooperasaun neebe mak diak ho ita nian dirijenti husi eskola sira, para iha informasaun ruma ita bele pasa ba malu, no husi eskola hasoru difikuldade ruma sira bele hatama mai ami, no ami mos bele hatoo fali informasaun ba iha nasional, nee duni ita nian linha kordenasaun servisu nee importante tebes,” dehan nia.
Patricio akresenta, aleinde halo koordenasaun diak ho eskola, maibe iha koordenasaun mos ho instituisaun relevante sira, ho nunee bele hatoo informasaun ba malu nee importante tebes, tanba eskola barak mak iha area remotas sira.
“Aleinde hau koordena ho eskola, hau mos halo koordenasaun servisu ho hau nian funsionariu sira, tanba ita ema ida deit, laos halo servisu mesak, maibe ita tenke apoiu malu ho ita nian maluk sira,” tenik nia.
Iha parte seluk, Diretor Servisu Edukasaun Munisipiu Ainaro, Patricio da Costa Magno hatete, nafatin halo koordenasaun ho eskola sira, nee importante tebes, iha asuntu importante ruma presiza hatoo ba malu, karik eskola sira hasoru difikuldade ruma hatoo mai iha SEM Ainaro, tanba koordenasaun nee diak no importante.
“Agora ita halo linha koordenasaun ho ita nian Diretor Ensinu Baziku sira kumpri nafatin ho ita, tanba iha Ainaro nee ensinu baziku 17, eskola misaun hamutuk 4, neebe ami sura hamutuk eskola 21 nee ami halo koordenasaun neebe mak diak,” tenik nia.
(jac)
