DILI, STLTIMORLESTE.com — Semaforu hanesan instrumentu regulador neebe governu monta hodi regula movimentu transporte publiku iha sidade, maibe instrumentu hirak nee kuaze fulan ida resin la funsiona iha sidade Dili, tanba avaria.
Semaforu sira iha kruzamentu Kolmera, Balide, kruzamentu Vila Verde, no kruzamentu sira seluk iha sidade Dili, risku ba asidente trafiku, maibe kleur ona avaria no ministeriu neebe tutela ba transporte publiku nian seidauk fo atensaun.
Tuir Matilde Nobre Lopes, kruzamentu sira hanesan iha Komera, Balide no Vila Verde, krusamentu sira ho movimentu transporte publiku neebe makaas, krusamentu hirak nee mak dalawain mak mosu engarrafamanetu grave no risku ba asidente trafiku iha dader no lokraik liu liu iha loron servisu hanesan segunda too sesta feira.
“Semaforu hirak nee aat ona pior mak laiha prezensa polisia tranzitu iha kruzamentu hirak nee, motorista sira ho konsensia rasik atravesa kruzamentu hirak nee ho koidadu atu bele minimiza asidente trafiku,” dehan Matilde ba STL iha area Kolmera, Kuarta (4/3/2026).
Matilde kestiona servisu Ministeriu Transporta no Telekomunikasaun neebe kleur ona abandona hela luz vermelha hirak nee hodi fo risku motorista sira neebe halo movimentu ba mai liu husi kruzamentu hirak nee.
“Ema sira servisu iha transporte nee hare ita sira nee hanesan ema neebe laiha folin, karik sira konsidera ita, loloos nee labele abandona hela lampu merah sira iha kruzamentu vital sira nee nafatin avaria, tanba peregu ba vida,” suspira Matilde.
Nunee mos Virgilho Neves lamenta tebes ho servisu ministeriu transporte nian, neebe la tau matan ba instrumentu regulador hanesan lampu merah sira iha sidade Dili laran.
“Ita liu husi kruzamentu sira nee tauk los, tanba laiha polisia, ita mak tenke matan moris, se sala oituan, bele hetan asidente trafiku,” dehan Virgilho.
Nia dehan, Polisia Tranzitu loloos marka prezensa iha kruzamentu sira neebe daudaun lampu merah la funsiona hodi bele regula movimentu transporte publiku, maibe realidade bainhira liu husi kruzamentu hirak nee motorista sira mak atravesa ho koidadu, tanba laiha prezensa polisia tranzitu nian iha kruzamentu hirak nee.
(god)
