DILI, STLTIMORLESTE.com – Xefe Suku Kolmera, Moises de Araujo Barros hatete, semana oin Banku Nasional Komersiu Timor Leste (BNCTL – sigla português) sei halo pagamentu ba idozus no defisiensia hamutuk nain 60 husi Suku Kolmera, maibe pagamentu sei halao iha Suku Motael.
“Iha Suku Kolmera ami nia idozus hamutuk 62, maibe nain rua mate, hela nain 60, husi nain 60 nee, nain 26 asesu ba ATM no simu direita nain 34, tanba nee tuir orariu husi BNCTL halao pagamentu monu iha loron 25 Marsu 2025, idozus sira nia osan simu iha Suku Motael,” hatete Moises ba STL iha Kolmera, Tersa nee (18/03/2025).
Nia dehan, total 60 kompostu husi aldeia rua mak hanesan Manu Fuik Rai no Rai Nain, nunee ba idozus Suku Kolmera nian 0halo pagamentu iha loron 25 Marsu 2025, iha Suku Motael tanba idozus Kolmera nian oituan.
“Nuudar Autoridade Lokal sente kontente, tanba husu apoiu Governu liu husi Ministriu Solidariedade Sosial no Inkluzaun (MSSI) bele fo tulun ferik katuas sira hodi sustenta nesesidade loron-loron nian, basa sira la forsa tanba idade ona, ida nee mak Governu nia responsabilidade hodi tulun nia povu liu-liu kbiit laek sira,” dehan nia.
Tanba nee, relasiona halo pagamentu ba idozus nian, orariu pasa husi BNCTL, nuudar Xefe Suku pasa tutan ba Xefe Aldeia hodi informa ba iha komunidade iha aldeia sira, atu nunee iha loron pagamentu sira bele mai iha Suku Motael, kuandu iha loron pagamentu refere mak idozus balu la mai, tanba moras Xefe Suku sei alista naran no husi aldeia neebe haruka ba BNCTL, depois husi banku direita ba sira hodi simu osan.
(joa)
