DILI, STLTIMORLESTE.com – Semana oin, Ministeriu Edukasaun (ME) liu husi Diresaun Nasional Edukasaun Inkluzivu Asaun Sosial Eskolar (DNEIASE) sei fo apoiu material emerjensia ba eskola 27 neebe hetan dezastre naturais.
Lia hirak nee hatoo husi Diretur DNEIASE, Fernando Soares ba STL, Sesta (12/12/2025). Nia hatete, pedidu foun neebe mak simu hamutuk eskola 27.
“Iha pedidu foun neebe ita simu hamutuk eskola 27, neebe hein deit semana oin ita halo distribuisaun apoiu material emerjensia ba eskola neebe hetan ona dezastre naturais,liu-liu hirak neebe mak ami simu ona pedidu,” katak nia.
Tuir Fernando, eskola 27 nee balun anin sobu no balun estragus. Kondisaun estragus nee grave duni, balun udan tama, tanba kalen kuak. Material neebe ME sei halo distribuisaun ba eskola nee mak hanesan kalen, besi no baut. Eskola 27 nee kuaze nibel ensinu baziku, inklui pre eskolar balun.
“Ita nian material hirak nee stoke hotu, neebe dadaun nee ita seidauk halo distribuisaun, maibe ninia prosesu tama hotu ona iha armajen. Nunee semana oin ita hahu halo distribuisaun ba ita nian eskola sira,”.
Nia hatutan, presiza halo identifikasaun atu nunee bele hatene kalen hira mak atu apoiu.
Jornalista: Jacinta Sequiera
Editora: Domingas Gomes
