DILI, STLTIMORLESTE.com – Ministeriu Solidariedade Sosial no Inkluzaun (MSSI) liu husi Institutu Nasional Seguransa Sosial (INSS) hamutuk ho Banku Nasional Komersiu Timor Leste (BNCTL – sigla português) halo konferensia imprensa hodi publika data ba pagamentu pensaun sosial ba faze primeiru ba idozu sira.
Ministra Solidariedade Sosial no Inkluizaun, Veronica das Dores hatete, pagamentu ba faze primeiru ida nee inklui mos pagamentu retroativu ba munisipiu 6, neebe la konsege halo pagamentu iha kuarta trimestre tinan 2024.
“Informa ba publiku liu-liu inan aman no ema difisiente ka benefisiarius pensaun sosial, lider komunitaria katak, pagamentu ba faze primeiru ba tinan 2025 nian sei hahu iha loron 17 Marsu 2025, no sei selu tuir rejiaun, Parte Leste sei hahu husi Munisipiu Lautem, rai klaran sei hahu husi Munisipiu Kovalima, Oeste sei hahu husi Munisipiu Ermera no RAEOA, ikus liu Munisipiu Dili sei hahu mos husi data refere,” hatete MSSI, Veronica das Dores liu husi konferensia imprensa iha Kaikoli, Dili, Kinta (13/03/2025).
Enkuantu, total benefisiáriu ba pensaun sosial neebe sei simu pensaun iha faze primeiru ba tinan 2025 hamutuk ema 107.786 iha teritoriu nasional, ho total orsamentu US$ 32.780.541,00.
Tanba nee benefisiariu ho tinan 60 to’o 69 sei simu US$ 60 kada fulan ho benefisiariu hamutuk ema 45.885, benefisiariu ho tinan 70 too 79 sei simu US$ 80 kada fulan ho benefisiariu hamutuk ema 44.121 no Benefisiariu ho tinan 80 ba leten sei simu US$ 100 kada fulan ho benefisariu hamutuk ema 17.780.
Dadus benefisiariu neebe iha Konta Bankaria Banku Komersial sira neebe eziste iha Timor Leste mak hanesan tuir mai, BNCTL, BNU, BRI, Banku Mandiri.
Entretantu tuir dadus neebe mak asesu ona iha konta bankaria banku sira iha Timor Leste kompostu husi BNCTL benefisiariu hamutuk 107.042, BNU benefisiariu hamutuk 387, BRI benefisiariu hamutuk 276 no Banku Mandiri benefisiariu 81.
Aleinde Pagamentu Retroativu ba Benefisiariu sira nee seidauk simu sira nia pensaun iha fulan Outubru, Novembru no Dezembru tinan 2024 nian, hanesan iha Munisipiu Lautem, Baukau, Ermera, Bobonaro, Kovalima no Likisa (metade), no INSS informa nafatin ba publiku katak, BCTL sei halo pagamentu retroativu tuir orariu ne’ebé mensiona antes neebe iha.
Tuir lista neebe INSS no BNCTL iha, benefisiariu hamutuk ema 48.128, no invalides hamutuk ema 5,148 ka 10.7% no ferik katuas ema 42,980 ka 89.3% mak seidauk simu sira nia direitu pensaun sosial ba fulan Outubru – Dezembru 2024 nian.
Nia informa, ba munisipiu seluk neebe enfrenta problema ho pagamentu bele informa ba pontu vokal INSS ka vizita eskritoriu INSS iha munisipiu hodi hato’o ita boot sira nia problema.
Tanba nee, Pensaun Sosial iha faze primeiru ba tinan 2025, benefisiáriu neebe iha konta bankaria no asesu ona kartaun ATM hamutuk ema 10.427 no benefisiariu neebe simu pagamentu ho konta bankaria direta hamutuk ema 97.359.
Aleinde nee iha rejistrasaun foun ba benefisiariu iha tinan 2025 hahu husi fulan Janeiru too fulan Marsu hamutuk ema 2.961, neebe mak iha hotu ona konta bankaria. Tinan 2025, INSS identifika benefisiariu balu neebe simu pagamentu dupla hanesan Funsionariu Públiku no Veteranus, nunee INSS elimina tuir Decreto-Lei N. 8/ 2024 de 24 de Janeiro Primeira Alteração ao Decreto-Lei n.º 53/2022, Artigu 16, no artigu 17 neebe hateten katak, labele halo pagamentu ba benefesiariu sira ne’ebe hetan prestasaun rendimentu trabalhu nian neebe integra tiha sistema regime kontribuitivu Seguransa Sosial nian.
Tuir planu no Lalaok Pagamentu 2025 ba benefisiariu Pensaun Sosial neebe utiliza kartaun ATM-BNCTL ka utiliza banku seluk mak INSS sei transfere ba banku hodi halo pagamentu fulan-fulan ka mensalmente, benefisiariu BNCTL neebe seidauk iha kartaun ATM ka laiha posibilidade atu trata tanba distansia, pagamentu ba sira sei halao kada fulan tolu ka trimestral no benefisiariu ne’ebe moras no labele desloka ba fatin pagamentu, Autoridade Komunitaria sei alista, entrega ba pesoal servisu deskonsentrasaun INSS no Sentru Sosial Munisipiu hodi kordena ho BNCTL ba halo pagamentu.
“Husu ba familia sira atu lalika lori benefisiariu sira neebe ho kondisaun moras too fatin pagamentu, tanba BCTL ho INSS komprometidu atu halo pagamentu iha uma ka sira nia hela fatin, hafoin pagamentu orariu normal remata, benefisiariu ba Pensaun Sosial bele hili atendimentu bankáriu eletroniku neebe BNCTL iha ho kustu neebe estabelese husi regulamentu internu BNCTL no Banku Komersial sira neebe eziste iha Timor Leste,” tenik nia.
(EST 3)
