DILI, STLTIMORLESTE.com – Semana oin Prezidente Parlamentu Nasional (PPN), Maria Fernanda Lay sei submete proposta lei Orsamentu Jeral Estadu (OJE) 2025 ba Prezidente Republika, Jose Ramos Horta, hodi promulga.
“Ohin ami halao reuniaun ida ho Prezidente Parlamentu Nasional katak, too ohin loron Sesta nee Prezidente Parlamentu Nasional seidauk haruka orsamentu ba Prezidente Republika hodi halo promulgasaun, maibe tuir planu Segunda feira (25/11) mak Prezidente Parlamentu Nasional sei submete direita ba Prezidente Republika,” hatete Prezidente Komisaun C Neebe trata Asuntu Finansas Publika, iha Parlamentu Nasional, Deputada Cedelizia Faria dos Santos ba jornalista sira, iha resintu PN, Sesta (22/11/2024).
Maibe iha loron Sesta feira nee PPN seidauk haruka ba Prezidente Republika, tanba asesor sira husi Prezidente Parlamentu Nasional presiza haree fali lai no sei imprimi fila fali dekretu hotu kedas iha surat tahan neebe mak kor espesfiku ba Prezidente.
Tanba tuir lei loron 30 Prezidente Republika tenki foti ona desizaun ruma ba OJE 2025, neebe nia atu veta ga ou promulga ga, nee ninia kompetensia.
Entretantu antes nee iha loron Kuarta (20/11) Parlamentu Nasional aprova ona Proposta lei Orsamentu Jeral Estadu (OJE) 2025 bilhaun US$ 2.617, iha final global ho votusafavor 42, kontra 23 no abstensaun 0.
(gui)
