DILI, STLTIMORLESTE.com – Semana santa eventu neebe importante tebes ba fiar kristaun, iha loron importante nee ema idak-idak presiza halo reflesaun ba aan.
Lia hirak nee hatoo husi Madre, Maria Imaculada de Aroujo Lopez Amaral, SSpS ba jornalista STL iha kapela Sentru Formasaun Polisia, Komoro, Domingu (13/04/2025).
Madre esplika, semana santa eventu neebe mak importante tebes ba fiar kristaun nia.
“Ohin ita selebra Domingu Ramos nuudar odamatan ba ita atu tama semana santa, ita hatene katak eventu semana santa nuudar eventu importante iha fiar kristaun nia, atu refleta hamutuk konaba eventu rua, premeiru hamutuk ita reflete bainhira moises lori povu israel sai husi rai ezeptu depois iha paska nee iha antigu testamentu mai iha Novu testamentu nia,” dehan Madre.
Madre dehan, iha semana santa nee ema idak idak presiza koko refleta ba aan nuudar ema sarani, saida mak presiza halo hodi mate ba aan nunee ho kristu nia moris his lori grasa no moris foun ba ema idak idak.
“Hanesan ema sarani ita reflete jesus neebe mai iha mundu atu salva ita hotu husi ita nia sala, entau iha tempu importante no forte sira nee husu ba ita hotu mai ita koko foti tempu reflete ita nia aan saida mak hau hakarak buka mate ba hau nia aan nunee hau mos bele hamutuk ho Kristu hodi moris hias hamutuk ho nia, entau ita koko mate ba ita nia hahalok sira, ita nia egoista, ita nia foti aan sira, ita nia odi malu sira,” katak Madre.
Madre hatutan, iha semana santa ema idak idak presiza halo refleksaun ba aan hodi muda hahalok aat, ba hahalok diak no redus tolok neebe sai tiha fali hanesan kultura, ho nunee ho Jesus nia terus no mate iha kruz salva ita nia sala no husi nia moris hias lori moris foun ba ema idak idak.
“Ohin loron ms liafuan tolok nee sai tiha kultura ba joven sira no ba familia sira, karik bele ita koko renova hahalok sira nee atu ita mate iha ita nia hahalok aat sira nee, atu nunee ita mos bele koko moris hamutuk ho kristu, atu nunee selebrasaun paskoa tinan ida nee bele lori netik buat ruma ba ita, selae ita selebra paskoa maibe laiha buat ruma neebe mak transforma ita nia moris,” dehan madre.
Nia dehan, hanesan peregrinu ba tinan esperansa nia mai koko tau fiar iha Maromak neebe husi nia terus salva ema ida idak, nunee hanesan peregrinus buka kolabora nunee bele salvasaun ba aan rasik nomos hola parte iha Kristu nia misaun, lori salvasaun ba ema seluk.
(eme)
