DILI, STLTIMORLESTE.com – Serimonia Palestra hodi komemora loron aniversáriu Komponente Aéreo ba dalan IV, tanba nee Institutu FALINTIL – Forsa Defeza Timor Leste (F–FDTL) halao atividadr seminariu hodi fo hanoin ba dezenvoliventu ba Komponente Aéreo nian iha futuru mai.
Nia dehan, fo ba públiku kona-ba ezisténsia Forsa Komponente Aéreo nian no mos dezenvolvimentu ninia nee para fo konhesimentu ba publiku, no segundu peritus sira mai halo aprezentasaun hamutuk ho estudante sira nomos sira neebe iha Komponente Naval.
“Ita halo siminariu ba ema fo hanoin para ita bele dezenvole no halo planeamentu ba ita nia dezenvolvimentu ba Komponente Aéreo ninia ba oin,” hatete Xefe Estadu Maiór Jenerál F–FDTL, Tenente Jenerál Domingos Raul “Falur Rate Laek” ba jornalista sira iha nia knaar fatin Kuartel Jenerál F-FDTL Fatuhada, Dili, Sesta (20/06/2025).
Nia tenik, realiza semináriu ida relasiona ho aniversáriu Komponente Aéreo ba dala IV nian, eventu ida nee kiik mais ba dezenvoliventu Forsa Aéreo nian.
“Hanesan ita boot sira hatene, uluk Portugés seidauk hanorin ita katak lalehan nee ita nian no tasi nee ita nian, so ita ukun aan tiha mak foin hatene espasu Aéreo mos hola parte soberania nomos espasu Maritima mos ita nian, Indonezia nian tempu mos nunka mais hanorin, tanba pasa tempu hodi duni ita tun sae para oho ita, maibe ita ukun aan mak foin hanorin ita no hatene, tanba nee ita orgulhu nuudar Timoroan, espíritu Maubere, maske ita hasoru difikuldade barak,” nia hatete.
Nia esplika, omenajen neebe husi martires no eroi sira mak tenke halao atividade sira nee ho servisu fuan ho laran para dezenvolve buat neebe mak iha ona ita nia responsabilidade.
“Hau haksolok boot mak ita hahu palestra ida nee ho titulu husi rai too lalehan, konkretiza vizaun F-FDTL nian neebe organiza, husu Komponente Naval Lijeira, FALINTIL Forsa Defeza Timor Leste (F-FDTL) nian, ita halibur malu iha nee laos deit atu nuudar reprezenta Forsa Armada nian, maibe iha mos reprezentasaun akademiku nian, liu-liu reprezentante universidade sira,” nia deklara.
Nia informa, realiza estratejia neebe iha ba Misaun F-FDTL nian, objetivu mak atu asegura katak, membru F-FDTL pereparadu atu hatan ba dezafiu sira neebe sei hasoru iha futuru mai.
“Ita hotu nia mehi no esperansa boot liu mak Forsa Aéreo halo papel ida neebe importante iha sistema Defeza nian, laos deit iha termus protesaun nian, maibe mos hodi hametin prezensa rejional no fornese apoiu umanitariu,” nia deklara.
Nia hatutan, dezenvolvimentu ba Komponente ida nee esensiál atu garantia seguransa no estabilidade Timor Leste nian, nunee kontribu ba pas no segurasa iha rejiaun.
“Palestra sira hanesan nee fo fizibilidade no konsiensia ba ita nia sosiedade, durante palestra nee sei iha oportunidade atu rona peritus no Komandante sira nian opiniaun, esperiensia no konhesimentu kona-ba dezenvolvimentu no implementasaun kapasidade Aéreo F-FDTL nian,” nia informa.
Jenerál nee husu hotu-hotu atu aproveita diak oportunidade ida nee, husu pergunta no diskuti buka matenek neebe sei oferese.
“Nunee mak ita sei kontinua harii armada ida neebe forsa no efetivu, no pereparadu ba dezafiu sira iha futuru,” nia koalia.
Iha fatin hanesan, Komandante Komponente Aéreu, Tenente Koronel Helder da Costa espika,foin maka iha oportunidade ida nee halo seminariu ida, no ida nee importante loos ba Komponente Aéreo.
“Ita foin permeira vez halo semináriu ida nee, tanba nee importante ba ami, no ami mós komponente foun, tanba nee presiza rona husi peritus sira mai koalia sira nia esperansa,” nia deklara.
Nia akresenta, peritus sira mai fahe sira nia hanoin no fo motiva sira atu nunee Komponente Aéreo bele halao sira nia planu ba futuru nian.
“Komponente Aéreo laos ema ida nian, maibe nee povu nian, tanba nee ami envolve ema hotu para mai fó hanoin oinsa lao ba oin, ita hatene laos agora maibe ba futuru nee ita halo oinsa para Komponente Aéreo nee bele lao ba oin,” nia afirma.
(jen)
