DILI, STLTIMORLESTE.com – Ministeriu Saude (MS) hamutuk ho parseirus sira hanesan Fundasaun Alola hodi halao sensibilizasaun teste kankru servikal no mamae ba Militar Femenina nonis esposa militar sira.
Nia esplika, sensibilizasaun nee importante tebes ba feminina militár no espoza militar sira kona-ba saúde feto nian, kankru servikal no kankru mamae, ida nee moras rua neebe afeta barak liu ba feto sira iha mundu tomak, inklui iha Timor Leste (TL).
“Ba feminina militár no espoza sira, ita iha papel importante iha família no sosiedade. Karik ita diak no saudavel, ita bele kontinua fo kontribuisaun ba nasaun no família ho di’ak liu, ita prevene mak diak duke ita kura, tanba ita saúdavel ita familia mós saudavel,” hatete Xefe Gabinete Xefe Estadu Maior Jenerál F-FDTL Koronel Marcelino Ximenes “RIZAI” ba jornalista sira liu husi nia diskursu iha Kuartel Jeneral F-FDTL Fatuhada Dili, Segunda (23/03/2026).
Nia agradese ba Ministeriu Saude (MS) nomos parseirus sira seluk neebe fo hanoin ona ba Militar Femenina nomos espoza militar sira hodi hatene klaru kona-ba moras kankru servikal no kankru mamae, tanba moras ida nee perigozu ba ema nia vida.
“Agradese no benvindu ba Ministeriu Saude no parseirus sira neebe bele hakat mai hodi fo informasaun ba Femenina sira neebe iha Instituisaun F-FDTL nian laran, tanba kankru servikal no mamae inimigu boot ba feto sira iha mundu tomak, liu-liu TL,” nia deklara.
Entretantu atividade ida nee halao kada tinan ho nunee Instituizaun FALINTIL-FDTL servisu hamutuk ho Ministeriu Saude hetan apoiu husi Fundasaun ALOLA, EPICC, UNFPA hodi kombate moras kankru servikal no kankru mamae iha Instituisaun FALINTIL-FDTL, tanba moras refere kuandu la halo prevensaun bele infeksaun no bele ameasa mos ba ema nia vida.
Tanba nee Komando FALINTIL-Forsa Defesa Timor-Leste(F-FDTL) liu husi Xefe Gabinete Xefe Estadu Maior Jenerál F-FDTL Koronel Marcelino Ximenes “RIZAI” halo abertura ba sensibilazasaun no teste kankru servikal no Mamae ba Femenina militares no mos espoza militar sira iha Salaun Auditóriu, Kuartel Jenerál F-FDTL Fatuhada Dili.
(jen)
