DILI, STLTIMORLESTE.com – Sentru Aprendizajen Infantil iha Prezidensia Republika fatin esperansa no kresimentu ba labarik sira, iha biban nee Prezidente Republika, Jose Ramos Horta dehan, nia hakarak salva labarik sira iha nasaun nee.
Sentru Aprendizajen Infantil iha Prezidensia Republika harii iha tinan 2011, Sentru Aprendizajen Infantil lokaliza iha Palasiu Prezidensial iha Aitarak Laran. Inisiativa inspiradora ida nee harii husi Prezidente republika Jose Ramos Horta, ho vizaun ida atu fo oportunidade ba labarik sira atu habelar sira nia kreatividade no aprendizajen haleu ambiente klase tradisional.
Sentru nee kria ho misaun ida neebe klaru atu kapasita labarik sira nia hanoin liu husi konhesimentu, kriatividade no oportunidade.
Sentru Aprendizajen Infantil oferese ba labarik sira alternativa ida neebe seguru no kuidadu atu gasta tempu iha dalan. Duke lao rai ka halimar iha estrada ninin, labarik sira simu iha espasu ida neebe sira bele esplora, imajina no sai buras.
Iha loron dahuluk, biblioteka simu deit labarik nain 25. Numeru nee aumenta lalais ba 52, no ohin loron sentru nee ho orgulhu serve labarik liu 200, hodi halo nia sai hanesan fatin ida ba komunidade nia moris edukasional no kriativu.
Iha tinan hirak nia laran, liu husi inisiativa sira hanesan Sentru Aprendizajen Infantil, dezenvolve ona feramenta no programa aprendizajen oin-oin. Sentru nee iha Biblioteka ida, iha neebe labarik sira bele lee no empresta livru sira hodi lee iha uma.
Espasu arte ida, iha neebe kreatividade buras no material resiklajen sira transforma ba obra arte furak sira. Apoiu Akademiku, inklui aula baziku Portuges, Matematika, Ingles, lee, no hakerek, liu liu ba labarik sira neebe luta iha eskola.
Programa Dezenvolvimentu Talentu, hanesan kanta, model, dansa, no lisaun instrumentu muzika, permite labarik sira bele aprende toka guitarra no pianu. Atividade Divertidu no Rekreasaun, inklui haree dezenu animadu ba labarik sira no nani.
Atividade hotu-hotu iha abut iha kuidadu no domin, reflesaun ida husi Prezidente Ramos Horta nia dedikasaun ba Timor Leste nia labarik sira. Esforsu ho fuan ida nee hetan apoiu tomak husi Primeiru Ministru Kay Rala Xanana Gusmão.
Iha biban nee, Prezidente Republika Jose Ramos Horta liu husi nia mensajen neebe STL asesu husi media PR Sesta (02/05/2025) hatete, nia hakarak salva labarik sira iha nasaun nee.
“Hau karik labele salva labarik hotu iha nasaun ida nee, maibe hau hatene katak hau bele ajuda balun atu asegura katak sira iha asesu ba edukasaun diak no oportunidade atu mehi. Hau hein katak ema seluk sei hetan inspirasaun atu apoia inisiativa ida-nee.” Dehan PR Horta.
Xefe Estadu dehan, liu husi inisiativa sira hanesan Sentru Aprendizajen Infantil bele hahu atu hasoru kestaun sira nee no kria futuru ida neebe nabilan liu ba oan sira no labarik idak-idak.
(eme)
