DILI, STLTIMORLESTE.com – Sentru Formasaun Juridiku no Judisiariu (SFJJ) produs ona Majistradus sira neebe liu husi Sentru Formasaun hamutuk nain 37 husi kareira Juiz nian.
Tuir Diretora Sentru Formasaun Juridiku no Judisiariu, Marcelina Tilman da Silva katak, Sentru Formasaun produs ona Juiz, Prokurador, no mos Defensor Publiku balu.
“Sura loloos sira neebe sai husi Sentru Formasaun Juridiku no Judisiariu Juiz hamutuk 37, Prokurador 38, no Defensor Publiku 35, maibe husi numeru nee menus ona, balu mate no balu la servisu ona,” dehan Marcelina ba STL iha Kaikoli, Dili, Kinta (21/08/2025).
Nia haturan, numeru neebe iha seidauk sufisiente, tanba oras nee dadaun planu hari tan Tribunal iha Munisipiu sira, aleinde mos hari Supremu Tribunal Justisa, tanba nee presija aumenta numeru rekursu umanu.
Tanba formasaun neebe halao iha sentru formasaun kontinua lao ho lian Portugues, maibe iha mos tetum juridiku atu termu portugues neebe ita nia formados sira aprende, sira bele koloka sira nia problema nee iha tetum juridiku.
No numeru neebe iha la sura ho formadus sira neebe sei halao estajiu, tanba nee espera formados sira neebe halao estajiu sei esforsu hodi passa atu servisu apoiu julgamentu sira iha Tribunal, hodi bele aumenta numeru autor judisial.
Iha fatin ketak, Jurista Alexandre Corte Real dehan, presiza aumenta rekursu umanu, atu nunee bele halao servisu iha Tribunal sira.
“Hau hanoin importante duni atu aumenta numeru rekursu umanu, tanba se ita planu hari Tribunal iha Munisipiu sira, presiza mos prepara ho rekursu umanu, “dehan nia.
Nia hatutan, ohin loron Timoroan barak mak halao estudu iha direitu no remata ona, tanba nee sentru formasaun iha planu loke tan konkursu, atu nunee sira bele kompete.
(ter)
