BAUKAU, STLTIMORLESTE.com – Liu ona semana rua Sentru Saude Baguia laiha kareta multi funsaun, tanba kondisaun avaria neebe daudaun sei halo manutensaun iha nasional.
“Kareta multi funsaun ba Postu Administrativu Baguia avaria, iha semana rua kotuk ba ekipa husi nasional lori tiha ona kareta nee ba halo manutensaun, maibe seidauk lori fila mai iha Postu Baguia,” hateten Administrador Postu Baguia, Mario Xavier da Silva ba STL iha Vila Nova Baukau, Tersa (17/06/2025).
Nia katak, Sentru Saude Baguia dook husi Hospital Rejional Eduardo Ximenes Baukau, maibe laiha kareta multi funsaun tanba avaria, nunee sei evakua ba nasional halo manutensaun, maibe seidauk lori hikas fali, nee fo impaktu ba kondisaun pasiente sira, bainhira emerjensia neebe presiza transfere lalais.
Tanba durante semana rua resin hafoin kareta refere avaria, Sentru Saude Baguia husu apoiu ba Sentru Saude seluk hafoin transferensia pasiente sira husi Suku ba Sentru Saude no husi Sentru Saude ba Hospital Rejional Eduardo Ximenes Baukau.
“Nee impaktu boot ba komunidade, tanba liu liu ema neebe presiza nee dala ruma dez araska oituan, neebe presiza tebes Ministeriu kompetente hadia lalais kareta nee, se posivel diak liu Ministeriu iha kareta karik haruka foun, doke haruka tuan nee mai halo manutensuan gasta osan boot, diak liu foun ita halo manutensaun kiik,” nia relata.
Xefe Sentru Saude Baguia, Agostinho Guterres rekoinhese, semana rua liu ba kareta multi funsaun neebe destaka iha Baguia hetan avaria neebe daudaun halo hela manutensaun iha nasional.
“Durante kareta hetan avaria ita hetan apoiu husi entidades hotu, hanesan PNTL Baguia, Autoridade Postu Baguia reforsa ami kobre area neebe labele kobre, sira apoiu atende komunidade sira,” hateten Agostinho Gutesira.
Xefe Sentru Saude nee katak, durante kareta multi funsaun avaria laiha impaktu ba pasiente sira neebe halo transferensia, tanba apoiu makaas husi Sentru Saude seluk no Servisu Munisipal Saude ho atendimentu emerjensia.
“Kareta nee uza tempu naruk ona, ita rekomenda ba nai ulun sira manutensaun no reparasaun nee mak kontinuasaun para hetan difikuldade atendimentu mak tenke lais buka solusaun ba ita nia komunidade neebe enfrenta problema Saude,” Agostinho Guterres rekomenda.
(tom)
