DILI, STLTIMORLESTE.com – Sentru Saude Munisipiu Ermera daudaun nee rejistu kazu moras dengue hamutuk 203, husi numeru nee maioria afeta bá labarik husi tinan 1 too 14.
Diretor Sentru Saude Munísipiu Ermera, Antonio de Deus Fatima hatete, kazu moras dengue neebe Sentru Saude nee rejistu hamutuk 203, maioria afeta ba labarik ho tinan 1 too 14. Husi numeru nee kompostu husi mane 99 no feto 104.
Nia afirma, intervensaun bá moras nee ekipa husi sentru saude kontinua rega fomigasaun hodi halao ba fatin risku sira, fahe abate ba komunidade hodi tau ba tanki no halo promosaun edukasaun saude kona-ba prevensaun ba moras dengue.
“Iha promosaun saude no sosializasaun nee ami ekipa la halo jeral deit, maibe ami halo door to door ka tama sai komunidade nian uma ho radius 200 metru hodi fahe abate, rega fomigasaun no seluk tan,” dehan nia ba STL liu husi telefone, Segunda nee (09/02/2026).
Nia katak, husi 203 nee nain 8 mak refere ba Dili, laos tanba labele halo atendimentu iha nee maibe tanba ekipamentu atu koko mak liu prazu ka expira ona. Neebe ohin ekipa husi sentru nee ba foti ona iha Dili.
Kona-ba ekipamentu hodi halo prevensaun bá moras dengue iha sentru nee sufisiente, tanba foin hetan distribuisaun husi Ministeriu Saude (MS).
Antonio hatutan, entretantu kona-ba moras rabies hahu husi Janeiru too Fevereiru nee rejistu hamutuk 35 neebe kompostu husi mane 21 no feto 14. Intervensaun neebe Sentru Saude halo mak servisu hamutuk ho vertenariu husi agrikultura hodi vasina animal sira, halo promosaun edukasaun saude kona-ba moras rabies nian.
(dom)
