BAUKAU, STLTIMORLESTE.com – Sentru Saude Tirilolo iha Postu Administrativu Baukau Vila, Munisipiu Baukau seidauk rejistu moras kazu dengue.
Xefe Sentru Saude Tirilolo, Luiza da Costa Belo esplika, Sentru Saude Tirilolo nia kobrementu atende pasiente sira husi Suku 6 iha Postu Administrativu Baukau Vila, neebe ho kada loron pesoal saude sira sempre fo atendimentu konsulta saude ba pasiente sira ho volume boot, maibe durante inisiu primeiru semana fulan janeiru tinan 2026 too ohin loron, sentru saude Tirilolo seidauk detekta kazu dengue husi pasiensia sira neebe kada loron halo tratamentu saude iha Sentru Saude refere.
“Primeiru semana ate agora Sentru Saude Tirilolo seidauk rejista kazu ba iha moras dengue nee, tanba dengeu nee laos foun ba ita promosaun saude laos deit husi pesoal saude, maibe husi media esperensia kada tinan iha haree iklima neebe iha komunidade sira sempre rona hatene tiha ona oinsa mak halo prevensaun moras dengue nian,” hateten Luiza ba STL iha nia knaar fatin Tirilolo Baukau, Kinta (29/01/2026)
Xefe Sentru Saude Tirilolo nee katak, moras dengue kontribui husi ambiente neebe la moos hodi kria susuk tolun no moris hafoin afeta ba komunidade sira moras dengue, maibe dadaun nee komunidade sira iha parte Baukau Vila iha ona koinhesementu kona-ba halo prevensaun moras dengue nian, tanba moras dengue laos moras foun ba komunidade sira, maibe moras nee kada tinan akontese, nunee liu husi esforsu pesoal saude nian husi tinan 2025 ba kotuk halo promosaun saude iha nivel Munisipiu too Aldeia konsege konvense ona komunidade sira halo prevensaun ba moras refere.
Nia informa, komunidade sira tenke nafatin halo prevensaun ba moras refere liu husi hamoos uma ninin, uma laran no importante liu kalan toba tenke uza moskiteru, maibe pesoal saude sira sei nafatin kobre husi Postu too Aldeia desimina prevensaun dengue ba komunidade sira nunee bele hatene hodi la afeta ba moras refere.
“Prevensaun nee programa husi Nasional too mai iha nee kontinuasaun, mezmu ita fo ona hanoin ba komunidade maibe ita nafatin fo hanoin ba sira, tanba nee parte importante ida katak nafatin halo prevensaun ba moras dengue,” Luiza argumenta
Entretantu Sentru Saude Tirilolo nia kobrementu ba komunidade sira husi Seiçal, Buruma, Kaibada Makasae, Kaibada, Tirilolo inklui Bahu.
(tom)
