DILI, STLTIMORLESTE.com – Iha fulan Marsu tinan nee Sentru Internamentu Vera Kruz halao rastreiu ba inan ilisibilidade sira hamutuk 90, husi numeru nee nain lima (5) mak pozitivu kankru serviks.
“Sentru saude internamentu ida nee halo rastreiu ba inan ilisibilidade sira liu-liu ba idade 30-49 no dadus akumulativu neebe mak pesoal saude treinadu sira akumula iha loron 25 no 26 Marsu hamutuk 90 no husi nee ita detekta kazu pozitivu kankru serviks nain lima, entaun sira daudaun nee hetan ona tratamentu,” hatete Xefe Sentru Saude Vera Kruz, Marilia Piedade ba jornalista sira iha Sentru Saude Vera Kruz, Sesta nee (28/03/2025).
Nia husu ba inan sira mai iha Sentru Internamentu Vera Kruz hodi halo chek up, tanba iha ona pesoal treinadu sira atu atende ita.boot sira.
Iha fatin hanesan, Mediku Espesialista Onkolojia iha Hospitál Nasionál Guido Valadares (HNGV), João Teodosio Amaral esplika, husi total moras kankru neebe rejista iha HNGV hamutuk 1400 resin, husi nee kazu sira neebe mak rejistradu tinan lima ikus hahu husi 2018-2024.
“Moras kankru neebe mak ita rejista iha HNGV, nafatin dadus anterior husi total kazu sira nee kankru susun mak numeru boot, tuir mak kankru tiroid parte kakorok nian, depois kankru kolorektal, kankru serviks no ikus mak kankru raan,” nia deklara.
Nia relata, husi kankru sira nee iha pasiente neebe mak mate tanba sira mai halo ho stadium grave, entaun la konsege halo tratamentu no la konsege halo transferensia ba rai liur liu-liu ba kemoterapia sira.
“Kona-ba pasiente mate iha duni, maibe agora hau laiha dadus exatus, tanba pasiente sira neebe mak banhira tama iha kuidadu paliativus ne’e sira ba baixa iha kuidadu paliativus nian,”.nia haktuir.
Nia informa, durante kazu barak mak halo transferensia ba rai liur halo tratamentu no balu konsege rekupera no balu iha kontinuasaun tratamentu no daudaun nee mediku sira iha HNGV halo hela tratamentu ba sira, tanba koalia kona-ba tratamentu nee iha faze ida dehan follow up, entaun iha kazu balu neebe mak iha hela tratamentu kontinuasaun, maibe iha Timor Leste seidauk iha testu ruma mak Governu TL transfere ba hospital sira iha rai liur.
“Tanba nee iha fulan Janeiru mai too Marsu dadus kazu kankru nafatin iha, maibe numeru exatu mak hau la lembra tanba kada loron kazu kankru kontinua rejista,” nia afirma.
(jen)
