DILI, STLTIMORLESTE.com – Ministru Justisa (MJ), Sergio Hornai hatete, esbosu kona-ba Advogadu Privadu nian iha ida deit, neebe lori ba iha Konselhu Ministru (KM) hodi halao diskusaun.
“Orsida ba iha neeba nee ida deit ona, la iha tan esbosu nee ida rua tolu, ida deit mak ita ba defende iha diskusaun,” dehan MJ, Sergio ba jornalista sira, iha Kaikoli, Dili, Kuarta (03/09/2025).
Nia hatutan, iha diskusaun bele uza referensia sira mai husi nasaun CPLP nian, haree husi nasaun sira ASEAN nian kona-ba rejime jeral neebe sai hanesan padraun ba ema hotu atu uza.
Tanba esbosu nee iha kintu lejislatura iha ona Parlamentu Nasional (PN), maibe mandatu kintu lejislatura hotu atu halo kontinuasaun liu husi sexto lejislatura Parlamentu Nasional nee nian, Governu presiza halo inisiasaun, halo ona diskusaun ho PN liu liu ba lei estruturante hirak maka MJ tau importante proridade ba iha Ministeriu.
No esbosu ida nee mos tama iha lei estruturante no diploma estruturante ba iha sktor justisa nian. Maibe iha kinto lejislatura esbosu konaba Advogadu nian too ona iha Parlamentu Nasional iha Komisaun A ba diskusaun iha parte Komisaun A, no altura neeba hanesan mos parte ida fo mos hanoin balu konaba lei Advogadu nian.
Maibe, iha sexta lejislatura hahu komesa ho nuno Governu halo servisu hamutuk ho Parlamentu Nasional atu reabertura fila fali liu liu ba projeito ida nee nian, hanoin balu atu kontribui liu tan ba nia kapitulu seksaun no artigu sira neebe iha, diak liu tan atu dinamiza no moderniza fila fali servisu neebe iha
Iha fatin ketak, Jurista Alexandre Corte Real dehan, sei la iha ordem dos Advogadus, sei labele regula Advogadu Privadu (AP) sira nia servisu.
“Se la iha ordem dos Advogadus, entaun la iha ordem ida hodi regula sira, signifika sira lao la tuir ordem, tanba nee presija aprova ordem dos Advogadu,” dehan Jurista Alexandre.
Nia hatutan, tenke iha ordem dos Advogados, atu regula kona-ba prosesu neebe sira kaer osan hira maka sira sei husu ba iha kliente.
Aleinde nee, Kordenadora Grupu Trabalhu Reforma Setor Justisa, Lucia Lobato dehan, sira nia parte mos halo ona diskusaun konaba lei Advogadu Privadu (AP) nian.
“Hau nia gabinete ami mos fo apoiu kona-ba esbosu ida uluk nee, ami mos halo diskusaun lubuk ida haruka ba iha Ministru Justisa, too agora la iha ema ida hatan, mas hau prepara ona se ema ida la hatan hau haruka diretamente ba Primeru Ministru, depois PM deside atu halo saida ho projetu neebe hau hatoo ba,” dehan nia.
Jornalista: Terezinha de Deus
Editora: Carme Ximenes
