DILI, STLTIMORLESTE.com – Ministru Justisa (MJ), Sergio Hornai hatete, prosesu harii Sentru Juvenil ba dadur sira neebe ho idade kiik lao hela.
“Sentru Juvenil nia prosesu sei lao hela, tenke liu husi prosesu ida, tanba nee ita tenke kumpri ba iha prosesu neebe iha,” dehan Ministru Justisa, Sergio ba Jornalista sira, iha Kaikoli, Díli, Sesta (5/09/2025).
Nia hatutan, tuir planu sei harii iha Tibar, tanba nee banhira prosesu hotu remata ona mak foin bele harii, hodi nunee dadur sira neebe ho idade juvenil tenke tau fatin ketak.
Iha fatin ketak, Diretor Nasional Servisu Prizional no Reinsersaun Sosial (DNSPRS), Delfio Soares alves hatete, pedidu kona-ba atu hari Sentru Juvenil haruka ona ba, tanba nee hein deit rezultadu neebe sei mai.
“Sentru Juvenil ita haruka ona pedidu ba, iha Diresaun Jeral Habitasaun no Urbanizasaun Ministeriu Obras Publiku,” dehan Delfio.
Nia hatutan, haruka pedidu autorizasaun no verifikasaun no Termu Referensia Sentru Juvenil nian no hein tempu ruma iha rezultadu mak sei prosesu kontinuasaun fali ba oin.
Aleinde nee, Jurista Jose Maria Guterres dehan, presiza instala sentru juvenil, atu tau dadur sira neebe idade juvenil ketak.
“Too tempu ona atu instala sentru juvenil, tanba ohin loron seidauk iha fatin ida ketak hodi tau dadur juvenil sira, maibe iha deit mak prizaun tolu,” dehan nia.
Jornalista: Terezinha De Deus
Editora: Carme Ximenes
