DILI, STLTIMORLESTE.com – Jurista Timor oan konsidera katak, kazu pendente iha Tribunal sira kontinua eziste, tanba rekursu umanus sei menus.
“Kazu pendente sei eziste, tanba falta rekursu umanu iha setor justisa, liu-liu iha Tribunal no iha Ministeriu Publiku,” dehan Jurista Sergio Dias Quitas ba STL iha Kaikoli, Kinta (26/03/2026).
Nia hatutan, agora iha ona politika husi Guvernu para halo rekrutamentu ba autoridade judisiaria sira, politika nee sai hanesan meius ida hodi prepara kondisaun para iha tempu ida bele redus kazu pendente sira.
Esplika tan, bainhira rekursu umanu nee sufisiente maibe falha hodi halo jestaun didiak ba rekursu umanu, agora no ba futuru mak sei hamosu nafatin problema kazu pendente sira nee.
Tanba nee presiza mos konsolida no halo jestaun didiak iha rekursu umanu tantu iha Tribunal, MP no iha Defensoria Publika.
Iha fatin ketak, Akademiku UNTL, Rafael de Jesus dehan, presiza aumenta rekursu umanus hodi redus kazu pendente iha Tribunal.
“Hau hanoin presiza aumenta numeru rekursu umanu, hodi redus kazu pendente neebe iha, tanba ohin loron ita hare katak prosesu barak maka tama iha Tribunal,” dehan nia.
Afirma tan, ohin loron universidade sira produs ona rekursu umanus barak, tanba nee prepara sira hodi iha futuru aumenta rekursu umanus ba iha setor justisa.
(ter)
