DILI, STLTIMORLESTE.com – Serimonia entrega servisu (hand over) husi Diretora Ezekutivu Hospital Nasional Guido Valadares (HNGV) sesante ba Diretor Ezekutivu HNGV atual Nuno Vital Soares, neebe kontinua lidera HNGV ba oin.
“Kargu ita bele troka, maibe hau nia profisaun profisional la troka, hau se servisu nafatin iha HNGV hamutuk ho Diretor Ezekutivu HNGV foun iha kualker tempu, prontu atu kolabora no servisu durante 24 oras,” hatete Diretora Ezekutivu HNGV sesante, Cecilia Barros Mendonça ba jornalista sira liu husi nia diskuru, bainhira entrega servisu ba Diretor Ezekutivu HNGV atual Nuno Vital Soares, iha HNGV, Tersa (11/03/2025).
Nia dehan, agradese ba Konselhu Diretiva, Kargu Xefia, Koordenador, Supervisor, Servisu Media no staf hotu nia kolaborasaun nomos servisu hamutuk durante nia mandantu bele atinji ona planu no programa iha tinan 2024.
Diretora Ezekutiva HNGV sesante esplika, iha nia mandantu ezekuta ona planu ka programa Orsamentu Jeral Estadu 2024 ba HNGV hamutuk 96%, signifika HNGV nia ezekusaun sae makaas wainhira halo komparasaun ho tinan hirak liu ba. Ezekusaun HNGV nia atinji 96% tanba iha kolaborasaun servisu hamutuk no esforsu tomak husi Konselhu Diretiva, Kargu Xefia no staf sira husi HNGV.
Iha fatin hanesan, Diretor Ezekutivu HNGV Atual Nuno Vital Soares informa, Diretora Ezekutiva sesante nee feto ida neebe forte tebes, tanba durante tinan ida resin hasoru dezafiu no rezolve problema barak durante nia mandatu.
“Hau ema foun neebe halo knaar iha HNGV, hanesan roo ida karik tama tasi boot hau haree HNGV forte tebes hanesan roo ida, tanba hodi ona roo nee lao durante tinan ida resin no hasoru ondas oin-oin ho anin boot, maibe tanba ho kapitaun neebe forte konsege pasa tempu husi ondas no turbelencia oin-oin,” nia informa.
Diretor nee deklara, nia sei nafatin kontinua planu no programa neebe Diretora Ezekutiva HNGV sesante husik hela no sei servisu hamutuk ho Konselhu Diretiva, kargu xefia no staf hotu hodi atinji planu sira nee.
(jen)
