DILI, STLTIMORLESTE.com – Embaixador Foun Estraordinariu no Plenipotensiariu Republika Demokratika Timor Leste ba Republika Portugal, Manuel Antonio Araujo Serrano hatete, durante nia mandatu sei buka hametin relasaun diplomatika no kooperasaun entre TL ho Portugal.
Embaixador Foun Estraordinariu no Plenipotensiariu Republika Demokratika Timor-Leste ba Republika Portugal Manuel Antonio Araujo Serrano hatoo liafuan nee ba jornalista bainhira simu tomada de posse husi Prezidente Republika Jose Ramos Horta iha palasiu Prezidensial Nicolau Lobato, bairru Pite, Kinta (27/11/2025).
“Hanesan embaixador foun ba fo deit kontinua deit ba serbisu sira neebe mak iha ona haree mos ba programa estratejiku de koperasaun neebe mak establese entre pais rua nee, ho nunee ita bele hametin liu tan ita nia relasaun diplomatika haburas koperasaun iha area sira neebe mak iha tuir orientasaun Governu nia tuir programa estratejiku neebe define ona husi 2024-2028,” dehan Embaixador nee.
Nia hatutan, sei hatutan mos serbisu neebe mak embaixadora sesante halo ona hodi kontinua nafatin ba oin.
“Programa neebe mak ejiste ona neebe ke embaixadora neebe durante nee halo fo kontiniudade ezemplu ba iha kapasitasaun dezenvolvimentu humanu no ba setor sira neebe mak relevante nomos tau atensaun ba assuntu konsuladu neebe mak liga ho sidadaun Timor oan iha diaspora ida nee hau hanoin misaun importante embaixada presiza haree,”tenik nia.
Nia hatete, durante nia mandatu buka kontinua serbisu neebe embaixadora sesante halo ona liu liu kapasitasaun ba dezenvolvimentu humanu, nomos haree mos Timoroan sira neebe iha diaspora ida nee sei tau atensaun makaas.
Alende nee Trabalhador Timoroan barak mak oras nee dadaun halao serbisu iha Portugal duranta mandatu sei tau matan mos ba ida nee kalae? Hatan ba kestaun nee Embaixador hatete sidadaun Timorense ou sidadaun estranjeiru iha neebe deit atu lao ba fatin ruma buka atu respeita uluk lei neebe mak iha neeba.
Nunee mos Sekretariu Jeral MNEK, Juvencio De Jesus Martins hatutan, Portugal hanesan pais ida neebe mak espesial ba Timor Leste, tanba durante rejistensia Portugal sempre akompanha Timor leste.
“ Portugal pais espesial tebes ba ita durante rejistensia Portugal sempre akompanha nunka husik ita sempre aprezenta nia aan hanesan potensia administrante neebe kaer metin nafatin ita nia kauza ba ukun rasik aan nunee Portugal ninia estatutu ba Timor Leste espesial tebes nunee senhor Serrano eskoila husi ita nia Governu husi Prezidensia atu halao knaar iha neeba, ita hotu fiar ita nia maun ita nia alin embaixador Manuel Serrano sei ba halo ninia knaar tuir buat neebe povu Timor hein no hakarak,” dehan nia.
Sekretariu Jeral nee dehan, planu no programa hotu mai husi Embaixador Timor Leste ba Portugal mak bele hatoo ba publiku, hodi hatutan saida mak Embaixadora Isabel halao ona durante nee.
Nunee mos Prezidente Republika Jose Ramos Horta hatete, relasaun bilateral entre Timor-Leste no Portugal nuudar parseria profunda no multifasetadu, ho abut iha istoria, lian, no kultura neebe parthilada. Ligasaun ida-nee reforsa husi akordu bilateral 77 no programa kooperasaun estratejika ida neebe ativu dezde 2011.
Xefe Estadu hatete, Portugal nia apoiu indispensavel iha setor krítiku sira hanesan edukasaun, justisa, no defeza, kombina ho dialogu polítiku ho nivel aas no konsistente, halo Timor-Leste sai parseiru internasional ida neebe vital no sustentavel liu.
Tanba nee Nomeasaun ba embaixador Manuel Antonio Araujo Serrano reafirma kompromisu Timor-Leste nian hodi hametin relasaun sira nee iha nível bilateral no iha Komunidade País sira Lian Portuges (CPLP).
Jornalista: Emerenciana Pinto
Editora: Domingas Gomes
