BAUKAU, STLTIMORLESTE.com – Servisu Rejistu no Verifikasaun Emprezarial, Institutu Publiku (SERVE, I.P.) Sukursal Baukau, rekolha emolumentus US$ 9.010.50 husi empreza hamutuk 284.
Koordenadora SERVE,I.P Sukursal Baukau, Lúcia Florbela da Costa Amaral esplika, trimestral dahuluk tinan 2025, SERVE, I.P Sukursal Baukau rejistu empreza hamutuk 284, kompostu empreza rejistu foun 74, renova lisensa 144 no alterasaun 64, empreza hirak nee konsege kumpri emolumentus ba kofre Estadu.
“Ita kobre reseitas ka emolumentus ba kofre Estadu husi Janeiru too Marsu mak total hamutuk US$ 9.010.50,” informa Lúcia ba jornalista sira iha nia knaar fatin Tirilolo, Baukau, Segunda nee (07/04/2025)
Nia sublina, emolumentus nee kobre fulan Janeiru hamutuk US$ 1.860.00, Fevereiru US$ 3.899.00 no Marsu US$ 3.251.50, neebe rekolha husi empreza ba konstrusaun, transporte publiku no empreza faan nesesidade baziku.
Nia fundamenta, SERVE, I.P aplika selu ba empreza sira regula tuir dekretu lei 83/2022, ba kada empreza halo atividade negosiu sujeita bainhira rejistu selu US$ 60.00 no atividade negosiu la sujeita la aplika taxa.
“Atividade nao sujeita ita rejistu gratuitamente, ita la kobre ba emolumentu, mak ezemplu kios kiik sira nee la kobre ba emolumentu,” katak Lúcia.
Nia argumenta, atividade negosiu la sujeita neebe SERVR,I.P la aplika selu, tanba regula husi dekretu lei 83/2023 hodi fo rejistu gratuita, enkuantu atividade negosiu sujeita aplika selu hodi kontribui kofre Estadu.
Koordenadora nee informa, durante trimestral dahuluk simu empreza rejistu foun hamutuk 74, kompostu empreza individual 57, unipessoal 16 no Lda (kontas limitada) 1, no daudaun hahu ona atividade negosiu, tanba hetan ona lisensa.
“Sira rejistu ona nee labele husik deit, kria netik fatin trabalhu ba ita nia ema sira, laos mai rejistu tiha halo fali buat seluk, nee labele,” nia katak.
Lúcia husu empreza foun 74 neebe hetan ona rejistu tenke kria kampu trabalhu hodi emprega Timoroan sira, tanba rejistu ona mak halo fali atividade seluk empreza bele lakon, tanba kada fulan selu taxa ba kofre Estadu.
(tom)
