DILI, STLTIMORLESTE.com – Servisu Edukasaun Munisipiu Bobonaro, servisu konjunta ho PAM no parte inspesaun bele kontrolu profesores iha ensinu aprendizajen iha eskola.
Tuir Diretor Servisu Edukasaun Munisipiu Bobonaro, Miguel Freitas dehan, husi parte edukasaun munisipiu labele servisu mesak, maibe presiza servisu konjunta ho parte PAM no inspesaun ninia, tanba area luan tebes-tebes, tanba nee sira presiza servisu konjunta no parte Bobonaro ninia nee labele halo kontrolu mesak ba aprendizajen iha eskola sira.
“Halo kontrolu profesores iha prosesu aprendizajen nee kada loron lao hanesan baibain, iha Munisípiu Bobonaro hau halo aproximasaun ho PAM, depois ami kria grupu boot ida, husi direitor munisipiu sira mos hola parte iha monitorizasaun nee, hanesan diretor fiskakizasaun, seguransa alimentar, planeamentu, ami involve hotu iha ami nian grupu, monitorizasaun nee ba too iha suku Sira,” dehan Direitor Servisu Edukasaun Munisipiu Bobonaro, Miguel Freitas ba STL liu husi telefone, Kuarta nee (07/01/2026).
Nia dehan, iha Munisípiu Bobonaro nee area luan tebes, tanba nee sira husu tan bele kria tan grupu boot ida nee, servisu konjunta neebe mak sira halo, sira tun direita ba iha terenu hodi haree ensinu aprendizajen neebe mak lao iha eskola ida-idak iha Munisípiu Bobonaro nia laran.
Iha parte seluk, Diretor Servisu Edukasaun Munisipiu Manatuto, Patricio da Cruz Quintao hatete, eskola sira balun iha area remotas distansia dook malu, maibe inspetores sira nian papel iha terenu importante tebes hodi bele kontrolu atividades neebe mak lao iha eskola sira.
“Durante nee ita nian Inspetores sira nafatin halo monitoring ba ita nian atividades neebe lao iha eskola sira, karik iha eskola balun neebe mosu asuntu importante ruma, nee inspetores sira servisu hamutuk. Durante nee monitoring ba atividades sira hanesan implementasaun merenda eskolar, prosesu aprendizajen no atividades hotu neebe mak lao iha ita nian eskola sira,” dehan nia.
Nunee mos Diretor Servisu Edukasaun Munisípiu Likisa, Julio da Silva dehan, durante nee inspetor eskolar sira nafatin halo monitoring ba eskola sira, liu-liu halo monitoring ba atividades iha eskola sira.
“Hau hanoin durante nee inspetor eskolar sira nafatin halo monitoring ba eskola sira, liu-liu halo monitoring ba atividades iha eskola sira, halo monitoring ba ita nian atividades prosesu ensinu aprendizajen ba iha eskola sira,” tenik nia.
Jornalista: Jacinta Sequeira
